Investiziun pi gronda pigl bagn digls scolars

DA GION NUTEGN STGIER / ANR

La scola a Lai vign sanada ed amplifitgieda. L’investiziun brutta monta ad 11,1 milliuns francs. Igl davos pled ò pero igl suveran. Decidia ò igl cunsegl communal er da screiver or dus plazzas per mang digl departamaint da construcziun. Igl domber dalla populaziun da Vaz è s’augmento igl davos onn per 4,3%. Venderde passo è igl cunsegl communal da Vaz s’inscuntro per la sia terza seduta. Cun esser la sanaziun ed amplificaziun dalla scola a Lai la tractanda principala ò la seduta gia li ainten l’aula dalla scola. Dasper la suprastanza, las 15 persungas tgi appartignan agl cunsegl communal cun la presidenta Alberta Kercho-Sigron era er preschaint Joos Gredig, digl biro d’architectura Gredig Walser SA a Coira. Digls seis biros d’architectura, tgi vevan inoltro lour plans per la sanaziun ed amplificaziun dalla scola a Lai ò chel retschet igl consentimaint digl cumegn da Vaz.

I mantgan stanzas 
adequatas

Igl bietg da scola a Lai ò passa 60 onns e la davosa gronda sanaziun è neida fatga avant 15 onns. Igl muteiv tgi igl bietg vign sano ed er angrondania è tgi man-tgan stanzas adequatas per dar scola conform agl taimp. Da preschaint ò Lai 120 scolars primars e 66 scolars dalla scola superioura, ò detg Elisabeth Sigron-Cantieni, ella tgi stat alla testa digl departamaint d’educaziun. Stefan Langenegger, igl manader da scola, el ò menziuno tgi dovra urgent stanzas noua tgi igls scolars possan luvrar an gruppas pi pitschnas u pi grondas, e noua tgi els saptgan er neir instruias singuls. Ozande dovrigl er stanzas da scola pi ampernevlas, pi cleras e cunzont er sainza canera. Migler tgi igl conturn seia, e pi bagn tgi igls scolars sa cattan. Vetiers vigna tgi cun en ambiaint ampernevel s’augmainta la prestaziun da mintgign. An spezial per l’instrucziun dalla nateira ed er per lavours da labor mantga ena stanza adequata, ò punctuo igl manader da scola.

130 occurrenzas 
per onn

Vaz è en cumegn cun bleras uniuns culturalas ed er otras. I mantgan localitads per chellas e perchegl vign er l’aula da scola angrondaneida. Ella duess daventar tar ena sala da cultura cun en spazi per 260 persungas. La tribuna vign pi gronda e la sala sezza vign pi clera, pi ampernevla ed er pi bela. Sigron-Cantieni ò menziuno tgi an en onn vegian gio ossa li 130 occurrenzas da tot gener ainten l’aula existenta. Sano e fatg da nov vign alloura er igl plaz da scola. Igl madem vala er per igls indrezs sanitars tgi correspondan betg ple agl basigns dad oz. Intern survignan tots dus bietgs da scola en nov vistgia ed da nov retschevan tottas dus las maseiras perscretgas digl schurmetg cunter incendis. Igls costs per la sanaziun ed investiziun montan ad 11,1 milliuns francs. Deliberar igl credit sto igl suveran, e chegl all’urna igls 19 da matg 2019. Igl cunsegl communal chel ò do gleisch verda persiva e chegl cun 13:1. Previa da scumanzar cun las ampremas lavours è igl avregl 2020. A fegn duess la sanaziun ed amplificaziun esser igl otgover 2021. Durant las lavours è la scola garanteida. Or digl mez digl cunsegl communal è nia detg tgi cun ena investiziun schi gronda seia aint igl avigneir da ponderar da renuztgier alla scola a Zorten e far angal ple ena scola a Lai.

Lavours da 
planisaziun

Chegl tgi pertotga planisaziuns da lengias d’ava, dall’ava persa, projectar novas lengias, adattar chellas allas ordinaziuns e per far ellas da nov ò igl cumegn da Vaz laschea far chegl ena firma externa. Cun dar ena midada tar chella firma è la suprastanza neida tar igl conclus tgi igl cumegn pudess sez far las lavours da planisaziun per chels projects. I seia migler d’aveir las persungas tgi fetschan chegl agl li, tgi da risguardar persungas d’orsoura. Siva pi lungas discussiuns ò igl cunsegl communal alloura decidia tgi igl cumegn da Vaz tschertga dus persungas digl rom (inschigniers u spezialists) per planisar, sanar e realisar projects da tottas sorts lengias. Las dus plazzas vignan proximamaintg scretgas or. Delibero on igls preschaints er en import supplementar da 205 000 francs agl deficit digl svilup turistic dalla Lai marketing support SA. Refuso ò igl cunsegl communal ena moziun pertutgont la sanaziun dalla plazza da sport. Sur d’ena sagonda moziun è betg sto da decider cun retrer igl iniziant chella.