Esther Loretan (60), scadlera dapi 1981 a Laax, Sagogn

Tgei munta il romontsch per Vus?

Per mei sco oriundamein Bernesa ha il romontsch ina muntada fetg impurtonta. Igl ei in lungatg cun ina bellezia melodia ed jeu sundel loscha ch’jeu hai astgau emprender romontsch.

Co promovis Vus il romontsch?

Duront la lavur ed el temps liber selegrel jeu d’astgar discuorer romontsch culs indigens. Per mei ei quei in’obligaziun ed ei secapescha da sesez ch’jeu s’integreschel en quella regiun romontscha era cun discuorer il lungatg che vegn duvraus cheu.

Tgei avegnir ha il romontsch?

Ins emprova da mantener e sustener quei lungatg. Per mei ei quei fetg impurtont. Jeu sperel e giavischel ch’ins detti vinavon quitau dil romontsch e ch’ins integreschi era el futur quei lungatg en l’instrucziun da scola.

www.100onns.ch