La secunda ediziun – L’UCP Mustér ha ediu 
in ulteriur magazin

(anr/hh) Igl unviern 2018 ha l’Uniun da commerci e professiun Mustér produciu per l’emprema ga in magazin cun reclamas dils commembers, mo era cun ina part redacziunala. Quels dis ei la secunda ediziun da quei magazin cul num «Nus vivin nies Disentis/Mustér» cumparida.

Sin rodund la mesadad dallas paginas sepresentan fatschentas da Mustér e contuorn. Igl ei biebein 30 commembras e commembers dall’Uniun da commerci e professiun Mustér. Il magazin che duei presentar la purschida dalla vischnaunca da Mustér e da vischnauncas vischinontas surtut als possessurs da secundas habitaziuns e hosps da vacanzas ei danovamein edius per gronda part en tudestg. Mo aschia pon ils adressats la finfinala era vegnir contonschi. Biebein la mesadad dil magazin ei reservada per contribuziuns redacziunalas che dattan in’investa en ina part dalla gronda purschida dalla regiun. Aschia sepresentan en quei magazin era las organisaziuns turisticas da Mustér/Sedrun, Medel, Sumvitg e Trun. In auter accent ein ils museums a Mustér: Quel dall’Uniun Cristallina, il museum dalla claustra e quel dalla fortezia Stalusa. Leutier vegnan entgins plaids dils responsabels pil magazin e dalla vischnaunca, sco era contribuziuns davart il menaschi tecnic dalla vischnaunca, ils Pumpiers Sursassiala e la problematica dil commerci e mistregn d’anflar emprendists e persunal qualificau. Ina gliesta cumpleta cun tuttas commembras e tuts commembers dall’Uniun da commerci e professiun Mustér sco era in tschuppel fotografias dalla regiun cumpleteschan il magazin cun in’ediziun da 2500 exemplars. Quels ein vegni reparti l’jamna vargada en tuttas casadas da Mustér, inclusiv las secundas habitaziuns. Tgi che giavischa in exemplar sa era retrer quel ella pasternaria e conditoria Goldmann a Mustér.