Aura schetga ha reduciu la producziun

Da Hans Huonder / ANR

Per l’Energia Alpina ei igl onn 2018 staus ell’enzenna da siu giubileum da 100 onns. Muort l’aura schetga ei la producziun d’energia hidraulica stada sut la media dils davos onns. L’Energia Alpina ei in’instituziun independenta dil dretg public dalla vischnaunca da Tujetsch. Ell’ei vegnida fundada 1918 d’entginas persunas ed ei dapi 1969 els mauns dalla vischnaunca. Da quei tierm ein ils responsabels e la populaziun dalla vischnaunca seregurdai igl onn vargau. L’interpresa ei sesviluppada cuntinuadamein ed ei oz in dils impurtonts patruns da lavur ella Val. Igl onn vargau ha ella occupau 25 persunas, da quei sis emprendists. Ina dallas finamiras principalas dall’interpresa ei da perfecziunar cuntinuadamein il persunal per aschia saver ademplir las incumbensas tenor criteris da qualitad. Per siu giubileum ha ella regalau ina tuor da giug d’energia, montada spel Lag da Claus. Quei indrez simulescha la producziun da differentas fuormas d’energia regenerabla entras in giug d’aua.

In tschéc gudogn

L’Energia Alpina ha fatg igl onn passau ina sviulta da bunamein 9,5 milliuns francs. Cun 3,44 milliuns francs ein las entradas ord l’energia per rodund 120 000 francs pli bassas ch’igl onn avon. Las entradas ella sparta dallas installaziuns ein perencunter carschidas per rodund 140 000 sin 2,9 milliuns francs. Las expensas totalas dil menaschi muntan a 7,15 milliuns francs ed ein per bunamein diesch pertschien pli aultas ch’igl onn precedent. Il cash flow dall’interpresa contonscha la summa da 2,35 milliuns francs. Suenter deducziuns e reservas dad 1,6 milliuns francs sedat in gudogn annual da 750 000 francs. L’Energia Alpina ha furniu 15,2 milliuns uras kilowatt a clients finals, quei ei ina reducziun dad in pertschien. Ella media dils davos diesch onns munta quei in minus da 7,17 pertschien. La sviulta d’energia ha contonschiu il volumen da bunamein 27 milliuns uras kilowatt. Quei corrispunda ad in minus da 6,7 pertschien enviers igl onn 2017.

Producziun sut la media

Suenter il grond donn caschunau dalla bova ella Val Strem ha l’Ovra hidraulica Val Strem puspei saviu vegnir messa en funcziun il december 2017. Sco quei ch’ils responsabels dall’ovra constateschan ha ella funcziunau fetg bein igl onn vargau. Cun rodund 7,5 milliuns uras kilowatt ei la producziun la secunda bassa dapi che l’ovra ei vegnida messa en funcziun avon exactamein diesch onns. En cumparegliaziun cugl onn avon ein las entradas sereducidas per rodund 225 000 francs. Ils donns vid ils indrezs dalla tschaffada, caschunai entras la bova, muntan a bunamein 2,6 milliuns francs. Bunamein tschien pertschien da quels cuosts ein vegni surprendi dallas segiradas. L’Ovra Val Giuv ha produciu 5,95 milliuns uras kilowatt (2,9 pertschien sut la media dils davos 38 onns) e l’ovra hidraulica cun aua da beiber Val Mila 0,65 milliuns uras kilowatt (11,1 pertschien dameins che la media dils davos sis onns). L’energia da participaziun e concessiun che l’Energia Alpina ha saviu retrer dall’Ovra electrica Reinanteriur munta a 14,2 milliuns uras kilowatt. Quei ei 13 pertschien dameins che la media dils davos diesch onns.

Buna fatschenta d’installaziuns

Cun sia partiziun d’installaziuns ha l’Energia Alpina fatg igl onn vargau ina sviulta da 2,46 milliuns francs. Quei corrispunda ad in plus dad otg pertschien en cumparegliaziun cugl onn precedent. Sco quei ch’ils responsabels dall’interpresa scrivan el rapport annual cumparius en vesta alla radunonza dils 14 da zercladur 2019 ei il volumen da lavur staus fetg buns duront igl entir onn ora. Ils projects dall’Arena da skis Andermatt-Sedrun Sport SA han procurau che l’Energia Alpina ei schizun vegnida als cunfins da sias capacitads. Ei seigi stau pusseivel da surmuntar quella fasa sulettamein cun biaras sururas e cun collaboraturs externs. La primavera vargada ei igl implont da hibrid sil tetg dalla halla plurivalenta Dulezi vegnius mess en funcziun. Il december ei la casa da scola vegnida colligiada vid la reit d’energia. Las empremas experientschas cun la reit d’energia muossan ch’objects cun ina prestaziun da pli pauc che 50 kw – quei che corrispunda ad ina casa da pliras famiglias cun sis habitaziuns – san buca vegnir administrai economicamein. Il motiv persuenter ei ch’ils cuosts da colligiaziun sco era da menaschi ein per bahgetgs pli pigns en relaziun mo pauc pli bass che per baghetgs gronds.

La radunonza communala dall’Energia Alpina ha liug venderdis, ils 14 da zercladur 2019 allas 20.00 ella Sala Cristalla dalla halla plurivalenta a Sedrun.