Buc in um da gronds plaids

Da Giusep Venzin/ANR

Roland Venzin da Curaglia ei buca sefatschentaus ditg culla schelta da sia professiun. Suenter in fuffergnadi tier Casatec a Mustér, ei el sedecidius da far leu igl emprendissadi d’installatur sanitar. Quei emprendissadi ha el gest terminau culla megliera nota grischuna da sia professiun. Malgrad quei success extraordinari conceda Roland Venzin da buca haver luvrau sur la media. «Igl ei iu ualti tgunsch.» Il Medelin ei buc in um dils gronds plaids. Sco ei para, ei el plitost igl um dalla lavur. Silla damonda davart ils puncts culminonts duront igl emprendissadi ha el numnau la construcziun dalla lingia d’aua da Cavardiras. «Tut il material ha stuiu vegnir sgulau neutier. Quei ei stau ina sfida extraordinaria.»

In secund emprendissadi

Venzin vul buca ruassar sillas arbagias: «Jeu fetsch in secund emprendissadi sco montader da scaldaments.» Era suenter il secund emprendissadi – quel cuoza dus onns – duei ei buc esser a fin culla scolaziun. Plans concrets hagi el denton aunc buc. «Ussa viel jeu guder il contonschiu e schar ruassar ils cudischs.»

«Gidar il bab el menaschi puril da famiglia», numna Roland siu hobi. Far il pur fussi era stada ina opziun.

Sper la lavur d’installatur vegni el adina ad esser bugen sil prau ni en nuegl. Oravontut far fein la stad seigi ina pissiun.

Il Medelin diligent vegn en scadin cass ad esser in giuvenil che vegn a nezegiar sias forzas e ses talents en favur dalla Surselva. Roland lai negins dubis: «La Val Medel lai buca liber mei.» En dus onns sto ella far quei per entgins meins. «Suenter il secund emprendissadi fetsch jeu la scola da recrut.»

A novs emprendists cusseglia Venzin da haver tschaffen e da s’engaschar. «Lu cattan els il sustegn dil patrun.»