«Briiigliant!»

(anr/abc) Venderdis ei tut stau preparau, las emprovas finidas ed il temps madirs per schar ir definitivamein sin viadi Phileas Fogg e siu survient Passepartout. Ella halla polivalenta a Vella ha ei dau ovaziuns. «Igl ei nundetg bi», ei il commentari unanim per la producziun. Il reschissur Roland Körner ha giu in bien maun ed ina buna truppa. El ha arranschau il musical «En 8o dis entuorn il mund» per e cun 19 acturas ed acturs dalla Surselva, cunzun dalla Lumnezia, ina band cun sis musicists e duas cantaduras da background. «Ina prestaziun grondiusa, da qualitad superiura», ha in um ch’ei per ordinari pli critics manegiau alla fin dalla presentaziun. Ei fuva vendergis-sera allas 22.50, e la premiera dil musical gest ida a fin. Quei ch’ei schabegiau sin tribuna ella halla polivalenta a Vella ei buca stau ina occurrenza ordinaria. Quei han las reacziuns dil publicum mussau. «Na, na, quei ei buca stau ordinari, bia dapli. Beeellezia», ha ina dunna puntuau. Ella ei vegnida a Vella cugl um e las duas mattatschas. Las feglias – ellas seigien plitost criticas – han schau plascher oreifer. Cunzun ils saults han fascinau.

Dicziun e pronunzia perfetga

Insumma han ins entupau mo glieud cun fatschas cuntentas, glieud ch’ei vegnida cun marveglias alla premiera. «Quell’inscenaziun ei sensaziunala», ha in um els tschunconta declarau all’ANR. Sper el dat ina dunna il tgau. Generalmein scrolan biars il tgau, perquei ch’els san strusch capir co igl ei pusseivel ch’ina gruppa da giuvenils dalla Surselva sa presentar tala qualitad professiunala. «Per mei ei quei stau in schenghetg ch’jeu vegnel mai ad emblidar», tschontscha ina dunna denteren. Ella ha buca vuliu tener per sesezza siu laud. Ed in um che ha vargau 70 onns commentescha cuortamein: «Fenomenal bi, in deletg.» Tut ils superlativs ha la premiera da «En 80 dis entuorn il mund» evocau. Igl ei buca stau memia cauld, buca memia freid, la tribuna d’aspectaturs alzada ora, mintgin ha giu il meglier plaz da seser, l’acustica ha constau, la dicziun dil lungatg tudestg perfetga.

Il romontsch vegn dil reminent buca alla cuorta en quei musical. Körner ha integrau quater scenas lumnezianas el toc. La giuvna lumneziana ei s’inamurada terribel en Passepartout, il survient da Phileas Fogg. Sil viadi da Paris encunter Brindisi ell’Italia setschenta il ballun ellas Alps, en Lumnezia. Seraina muossa la via ed accumpogna ils dus viagiaturs sur la Greina. Il viadi dad 80 dis entuorn il mund para nunpusseivels. Las rodas dentadas che dumbran ils 80 gis giran, dretg davon la tribuna eis ei in element static, mo impurtont. Sco aspectatur vegnan ins tschaffaus dalla historia, ins vegn ella febra e sedamonda sch’ei gartegi propi. Malgrad ch’ins sa ch’ei dat in «happy end», resta la tensiun tochen il davos.

Ei ha valiu la peina

En 25 scenas, 15 avon e diesch suenter la pausa, sa il publicum accumpignar il viadi aventurus da Londra ed anavos a Liverpool, cun tren, cul ballun, a pei, cun bastiments tras il canal da Suez, sur ils oceans. Ins gauda la sentupada da Phileas Fogg culla princessa Aouda.

Denteren adina puspei saults sperts, veramein fenomenals, influenzai dallas culturas, e musica nundetg tschaffonta. Il musical integrescha tut quei ch’ins giavischa, cun coreografias da sault, musica, canzuns, costums, maletg da tribuna, tecnica e dialogs. Tut para professiunal, strusch auter che tier ina inscenaziun a Basilea, a Turitg, ni el teater d’in marcau grond. Aposta per quei project han ins fundau en Lumnezia l’uniun Musical Lumnezia. Ei fuva previu d’inscenar il toc «Mamma Mia» dad Abba. Ils dretgs ein denton buca stai d’acquistar. Aschia ha ei cuzzau in’uriala entochen che l’idea d’in project niev ha seschau realisar. Ei ha valiu la peina, forsa ha ei duiu esser aschia. «En 80 dis entuorn il mund» ei buca «Grease» ed era buca «High School Musical». Quels haveva la Scola da musica Surselva presentau ils davos onns cun grond success. Quei ch’ins sa admirar e guder actualmein a Vella ei auter, ei survarga tut.

Suenter la premiera e duas producziuns da sonda e dumengia, dat ei aunc sis producziuns denter ils 25 d’october ed ils 2 da november. Ins sa reservar bigliets telefonicamein naven da gliendisgis tochen sonda, denter las 19.00 e las 19.45 (078 853 32 95), ni direct tier www.musical-surselva.ch