Zeccas sa derasan vinavant en Svizra

Fin la fin da l’october èn 251 cas da meningoenzephalitis (FSME) vegnids annunziads. Tenor l’Uffizi federal da sanadad publica è quai il terz grond dumber dapi l’onn 2000. Dapi l’onn 2000 sajan vegnids annunziads durant il medem temp mintgamai tranter 52 e 356 cas, scriva l’Uffizi federal da sanadad publica. Ils pli blers cas haja dà l’onn 2018, ils segund blers il 2017. Vinavant constatescha l’uffizi ch’i dat da mais tar mais ina gronda fluctuaziun. Pervi da morsas da zeccas sajan 18 000 persunas idas tar il medi. Quest dumber correspundia a la media da plirs onns, scriva l’Uffizi federal da sanadad publica. 9300 cas acuts da borreliosa sajan vegnids annunziads.

Las pendicularas da Tschiertschen han scrit cifras nairas l’onn da fatschenta 2018/19. Quai dentant mo grazia a donaziuns da 350 000 francs. Sut il stritg han las pendicularas fatg in gudogn da bunamain 170 000 francs. Quai tar entradas da radund in milliun francs. Avant amortisaziuns, taglia e donaziuns resulta però ina perdita da 31 000 francs. En vista a la situaziun da naiv che saja stada ideala, saja la situaziun finanziala da las Pendicularas da Tschiertschen alarmanta.

Quitads per la plazza da lavur, dapli stress e pressiun, strusch purschidas da perfecziunament ed ina paja che stagnescha. Lavureras e lavurers en Svizra èn adina pli malcuntents cun las cundiziuns da lavur. Quai demussa in studi da l’organisaziun tetgala dals lavurers. 42,3% dals lavurers sa sentan savens u fitg savens stressads entras la lavur. Quai è in augment da 2,3 puncts procentuals cumpareglià cun l’onn avant.