Il preventiv per 2020 quenta 
cun in grond gudogn

(anr/hh) La radunonza communala da Trin ha approbau unanimamein il mardis sera il preventiv dalla vischnaunca pigl onn 2020. Tier ina sviulta da rodund 8,2 milliuns francs quenta quel cun in gudogn da rodund 525 000 francs e quei tier amortisaziuns da biebein 700 000 francs. Las investiziuns nettas pigl onn vegnent ein calculadas cun 980 000 francs. Vischinas e vischins han decidiu da laschar il pei da taglia sin tschien pertschien dalla taglia sempla dil cantun. Per endrizzar la stizun dil Volg egl anteriur luvratori dall’ovra electrica a Trin Mulin conceda la vischnaunca in sustegn finanzial da 290 000 francs. Ils cuosts totals persuenter importan 440 000 francs. Cun clar pli ha la radunonza communala approbau l’adattaziun dil regulativ da taxas per l’indemnisaziun dallas autoritads e las cumissiuns. La finfinala han vischinas e vischins concediu in credit supplementar da 120 000 francs per la sanaziun dalla tschaffada d’aua a Trin Mulin. Per la fin dalla davosa radunonza communala da quest onn ei vegniu orientau davart il retuorn al proprietari dall’Ovra hidraulica Pintrun. Quei ei il cass igl onn 2024. Lu duein ils indrezs vegnir en possess dalla vischnaunca.