Virolar: Ea/Na – en pêr giovens peglian posiziun
Pigl mument èn virolos an Svizra en po daple tgi la mesadad dalla gliout. Igl squitsch cunter chellas persungas tgi n’èn betg viroladas peglia tiers. La prontadad da sa lascher vaccinar è pi gronda aint igl martgea e l’aglomeraziun tgi sen la campagna.
Scu stattigl an Surmeir? Tge èn igls muteivs per sa lascher virolar tar la populaziun e tgenegns pitost cunter? 5 persungas explitgeschan lour meini. A tots ègl pero fitg impurtant da menziunar tgi chegl seia igl sies meini persunal ed els viglian attatger nign cun las sias declaraziuns. An Svizra vala la libertad d’opiniun e chella dess neir respectada dad egn e mintgign.
Flavio Guetg (30) Coira/Savognin
Ia va ma laschea vaccinar. Ia sung pero tuttegna betg persvadia digltottafatg dalla tgossa e surtot da chel mettel tg’ia va survagnia sprizzo. Pero vaia tadlo en tant segl cunsegl digl Cunsegl federal da sa lascher vaccinar. Er ainten la nossa firma, la Veiadafier retica, ans onigl cunsiglia da lascher far la virola. En oter muteiv tg’ia va ma laschea virolar è franc er, tg’ia va cunsiglia agls mies tats e tattas da lascher far la virola. Uscheia sunga ia cun bung exaimpel davantor. Ia anclei pero er mintgign tgi vot betg sa lascher virolar e cat tgi chegl duess rastar la decisiun da mintga singul.
Corsin Carisch (21) Riom
Ia va betg fatg la virola e niro er mai a far ella – mianc per raps. Tenor me on bleras otras virolas, scu per exaimpel chella cunter meir (Mumps),hepatitis ni cunter zetgas stuia eir tras ena examinaziun tg’ò cuzzo blers onns. Alloura ègl per me simplamaintg betg pussebel tgi ena virola cunter igl virus da corona so neir fabritgeida an en pêr meis. Per me scu persunga giovna e fitta, tgi ò mai problems da sanadad fògl simplamaintg nign senn da ma lascher sprizzar aint teissas chemicals tg’ins so mianc tge tg’igl è. A me ègl er tuttegna da desister sen festas e viadis aint igl exteriour anfignen tgi chella antiera istorgia da corona è passada. La mia sanadad am è pi impurtanta. Chella ò ena valeta nunpaebla. Ossa cun chella classa da sagonda qualitad tgi vign a dar ins sogl er creir navot ple alla nossa regenza.
Jrina Andenmatten (21) Stierva
Ia va betg ma laschea vaccinar e va er betg ansenn da far ensacuras. Ia ma fatschaint savens cun temas dalla evoluziun e la nateira ed igl mies sentimaint am dei tgi chella virola corresponda betg cun las mias persvasiuns. Venavant vaia er fadeia cun la virola cunchegl tg’ella è midada geneticamaintg e chegl ègl ansasez anc mai do anfignen ossa. Nous vagn nignas prognosas a lunga vista ed ansomma, chegl cun chella DNA catta simplamaintg risco. Ia sung surstada tgi tantas persungas èn prontas dad eir aint chel risc da sa lascher sprizzar ensatge tg’ins so betg tge tg’igl è. Sur las medias nign nous angal an contact cun tot chegl tg’è per la virola. Ma ia va fatg atgnas retschertgas e constato per me tgi chel virus da corona è mianc schi nosch scu chegl tgi vign detg. Ia va er vurdo videos tgi decleran bagn la virola e tge tgi capetta aint igl noss corp. Chegl am dat alloura da pansar ed ia crei tgi er oters tg’on sa laschea virolar fissan schocos schi vessan vasia chels videos. Egn da chels tg’ia va vurdo vaia lia tarmetter anavant a mia sora. Ma ella ò betg ple savia vurdar el cunchegl tgi Youtube ò stido chel video perchegl tg’el corresponda betg allas directivas. Talas tgossas am fon simplamaintg enorm suspect. Schi en bung video è cunter la virola vign el simplamaintg piglia or digl internet – chegl sogl betg esser. Ainten las medias vign publitgia angal chegl tg’è per la virola. Ed ansomma – pertge va ia da ma lascher vaccinar sch’ia stò purtar tuttegna anavant ena mascrigna, tigneir distanza e savess er cun virola m’infectar cugl virus? E tg’ins vegia en migler decurs dalla malsogna sch’ins è virolo creia betg. Ia desist er gugent a festas e vacanzas e vign persiva ainten la nossa bela nateira e stung a tgesa. Schi am vottan piglier la libertad da betg saveir eir ad occurrenzas perchegl tg’ia va betg la virola alloura dessigl. Ia sung er pronta da perder la lavour avant tg’ia ma laschess virolar. Alloura è ensatge pir dretg marsch ve da chella antiera tgossa.
Seraina Jäger (17) Cunter
Ia va fatg la virola perchegl tgi mia mamma ò detg da far ed ia fatsch ansasez adegna chegl tgi mia mamma dei. Ia cat simplamaintg migler da lascher far la virola an pe da survagneir igl virus. Schiglio ins è er pront da far otras virolas per eir an teras estras – pertge alloura betg chella cunter corona. L’antschatta sunga er betg stada persiva da far la virola perchegl tgi gl’era tot en po tschert. Ma alla fegn finala sunga ma decideida da far la virola. I so gidar tgi sa derva puspe tot e l’antiera situaziun sa schleia e perchegl sunga stada pronta da far chegl. Er simplamaintg per sustigneir l’immunitad collectiva. Per me ègl en po scu tigl eir cun auto. Lò ast aint en airbag e chel è pigl ties agen schurmetg. E per me è er la virola cunter corona en schurmetg.
Laurin Luzio (22) Savognin
Ia va fatg chesta stad la virola. Ia va spitgia anfignen tgi las persungas da risc èn stadas vedlonder e siva vaia m’annunztgia. Glè musso se tgi te dast anavant pi pac igl virus schi te ist virolo. Ed ia tgi lavour ansemen cun blera gliout e sen differentas plazzas da biagier less betg dar anavant igl virus. Mies tat totga tar la gruppa da risc e per saveir vaseir el venavant sainza aveir tema d’infectar el vaia lia ma lascher vaccinar. Ia va ansenn dad eir a viandar l’otr’onn e chegl è franc pi simpel sch’ia sung schon virolo.
«En muteiv tg’ia va ma laschea virolar è franc er, tg’ia va cunsiglia agls mies tats e tattas da lascher far la virola»
Flavio Guetg
«Pertge va ia da ma lascher vaccinar sch’ia stò purtar tuttegna anavant ena mascrigna?
Jrina Andenmatten
«A me ègl er tuttegna da desister sen festas e viadis aint igl exteriour»
Corsin Carisch
«Glè musso se tgi te dast anavant pi pac igl virus schi te istvirolo.»
Laurin Luzio
«Ia cat simplamaintg migler da lascher far la virola an pe da survagneir igl virus.»
Seraina Jäger
Gust da leger dapli?