«In bi mument ei aunc pli bials cun buna musica»

«La senda dalla verdad» ei il tetel dalla canzun la pli nova da Flavian Krol da Sedrun. Il text ha el scret en tuatschin ensemen cun siu frar Gian. La historia dil «bien Gieri» sereferescha alla detga dalla platta dallas strias. La melodia ha Flavian Krol cumponiu seschond inspirar d’ina melodia d’in cantautur talian. Sias canzuns ein per gronda part en romontsch e dad el sez, ils texts vegnan ord il profund da si’olma. Sco el di selai quei buca sfurzar e vegn cu ei vegn. Enqualga conta el denton era covers. La vusch dil cantautur ei profunda ed ha in colorit harmonic. Il giuven da 28 onns fa musica da pop, folk cun influenzas da country. Dus da ses musicists preferi ein Ben Howard e White Buffalo e sco Krol di, hagien quels influenzau grondamein siu stil. «Jeu teidlel gl’entir di musica. In bi mument ei aunc pli bials cun buna musica.»

«Jeu laschel schabegiar»

La passiun per la musica ha tschaffau Flavian Krol ella vegliadetgna da circa 13 onns. Ensemen cun ses amitgs da scola Dario Hess, Carlo Caduff e Fabian Deplaz ha el fundau sia emprema band. Lu sunava el bass mo ha spert midau sin ghitarra acustica. Da buob ha el giu enzacontas uras scolaziun da musica, propi da sunar ha el denton empriu a moda autodidacta e cun agid da ses amitgs e filmins sin Youtube. «Jeu cantavel gia lu fetg bugen e savens era mo per mei e quei va meglier d’accumpignar culla ghitarra», declara il cantautur. En giuvens onns semiavi el da conquistar las tribunas grondas mo hagi lu spert giu autras prioritads. «Dar concerts mintga fin d’jamna ei buca propi miu mund. Jeu sepresentel bugen ina ga ni l’autra cun amitgs sco Dario Hess ni Pascal Gamboni, ir activamein ina via musicala ei denton buca mia finamira. Pertuccont la musica laschel jeu plitost schabegiar quei che schabegia», declara il Tuatschin. Forsa ha quei era da far cun siu caracter. Krol di numnadamein ch’el stetti buca bugen el center: «Jeu hai negins problems da star sin tribuna, stoi denton buc esser el center e far ina gronda show.»

Dil miradur al fisioterapeut

Era professiunalmein enquera Flavian Krol sia ventira. Suenter gl’emprendissadi da miradur ha el luvrau sin mistregn mo era surpriu auters jobs sco tschentapegnas ni sco montader da pendicularas ed era ella gastronomia. Il giuven ei era staus empau pil mund entuorn ed ha passentau in miez onn en l’Indonesia ed en Nova Zelanda. Duront quei temps ha el scuvretg sia gronda passiun per surfar e manegia che quei seigi bellezia e ch’el mondi sche pusseivel mintg’onn enzanua sper la mar per far surfing. Allura ha el entschiet la scolaziun da menader da construcziun, denton buca terminau quella. «La lavur sil baghetg era buca propi quei che cuntentava mei e perquei hai accumpignau il bab enzacons dis», raquenta il fegl dil fisioterapeut Jan Krol. Il bab Jan ei oriunds dalla Hollanda, la mumma Rita Venzin ei ina Tuatschina. Era siu cusrin ha empriu da fisioterapeut e ludau la scola e la biala veta da student en Hollanda. Quei tut ha perschuadiu Flavian Krol ed el ei partius viers la Hollanda, empau era per anflar sias ragischs.

En Hollanda ei tut plat e grisch

Ils davos treis onns ha Flavian Krol pia studegiau en Hollanda e fa actualmein siu praticum a Laax e Flem. Mo co ha quei lu plaschiu ella patria dil bab? «Jeu hai studegiau en ina scola internaziunala ed il lungatg principal fuva engles. Il contact culs indigens haiel strusch anflau, sulet enqualga culla famiglia dil bab che viva aunc leu hai jeu discurriu hollandes», aschia Flavian Krol. La fin finala eis el staus leds da saver turnar en Svizra: «Ils unviarns ein lunghezia en Hollanda, igl ei savens grisch ed il vent trai quasi adina. La tiara ei tut platta ed a mi muncavan ils cuolms», conceda Flavian Krol ch’ei carschius si a Sedrun. Sch’el surpren in di la pratica da fisioterapia dil bab sa el aunc buc. Igl emprem stoppi el finir il praticum, sciver sia lavur da diplom e dumignar ils examens finals. Allura lessi el en mintga cass aunc rimnar empau experientscha sco fisioterapeut. Che quella lavur schai meglier ad el che la lavur sil baghetg sa el denton gia ussa dir: «Jeu lavurel fetg bugen culs pazients, respectivamein clients ed igl ei bi da survegnir resuns positivs e segns da renconuschientscha sch’ins sa gidar. All’entschatta ha quei denton duvrau empau temps d’ughegiar da tschappar en – in carstgaun ei buc in toc betun.»

Concert a Trun :

Sonda proxima, ils 6 da november naven dallas 21.00 envidan Dario Hess, Martin Gugger e Flavian Krol al concert communabel ella Sala d’art a Trun. Ils treis musicists fan musica da contry, blues, rock, irish e folk romontsch. L’entrada ei cun certificat da Covid e cuosta 20 francs per persuna.

• Cuort e bien:
• Num: Flavian Rafael Krol
• Datum da naschientscha: 20 d’uost 1993 (liun)
• Grondezia: 1.88 m
• Numera da calzers: 45
• Lungatgs: Romontsch, tudestg, hollandes, engles ed in tec talian
• Finamiras: Edir igl emprem agen disc cumpact avon il 30avel. Daventar independents sco fisioterapeut entochen il 35avel.
• Hobis: far surfing, skis, velo da muntogna, cross fitness
• Cudisch preferiu: Der Alchimist da Paulo Coelho. Quel legel jeu adina puspei. Igl ei empau in muossavia per la veta, in appell da tedlar sil cor e l’intuiziun e quei fetschel jeu ton sco pusseivel.
• Spisa preferida: Igl atun selegrel adina sin menus da carn selvaschina da mes amitgs ch’ein catschadurs.
• Bubronda preferida: En sortida pier freid. Schiglioc mo aua e caffè.