Schluein: Pei da taglia resta sin 50 %

Il pei dalla taglia communala sin gudogn e facultad resta gl’onn 2022 a Schluein sin 50 pertschien dalla taglia cantunala. Quei ha la radunonza communala decidiu mesjamna sera. Il conclus ei staus unanims, la tractanda ha svegliau ni discussiuns ni objecziuns. Plinavon han ils da Schluein giu da decider davart il pei dalla taglia sin schischom. Quella quota resta medemamein sco tochen dacheu sin 1,5 promelli. Il preventiv 2022 che la supra-stonza communala ha presentau alla radunonza sebasa sil pei da taglia da 50%. Tier entradas da 3 090 917 ed expensas da 3 003 150 francs quenta l’executiva cun in surpli d’entradas da 87 767 francs. Il quen d’investiziun 2022 preveda expensas da 1 130 000 ed entradas da 480 000 francs. Vinavon ha la radunonza approbau il preventiv digl onn da scola 2022/23 dil Consorzi da scola superiura Scolaviva. Era la damonda da credit pertuccont la sanaziun dil plaz avon il luvratori communal a Cleus ha buca svegliau discussiuns. Ils presents han concediu il credit da 150 000 francs.(fmr/abc)