Mustér: Incendi caschuna considerabel donn

La dumengia encunter sera ein polizia, pumpiers e salvament stai en acziun el center dil vitg da Mustér. Allas 16.45 han vischins constatau fem che sorteva d’ina habitaziun. Ladinamein han els alarmau ils pumpiers e cura che quels ein arrivai el liug haveva la polizia gia evacuau las persunas pertuccadas. Cun apparats per proteger la respiraziun ei in emprem trup da pumpiers entraus ella habitaziun e fruntaus immediat sin fem ner e spess. Ad el eis ei reussiu da stizzar beinspert il fiug. La habitaziun ei allura vegnida ventilada, medemamein las ulteriuras. Sco quei che la polizia cantunala communichescha ha ina dunna stuiu vegnir transportada cull’ambulanza en spital. Ella haveva pitiu dil fem. Ils donns vid la habitaziun ein considerabels. 19 pumpiers, dus polizists cantunals e duas persunas dil Salvament Surselva ein stai en acziun. La polizia cantunala sclarescha ils motivs digl incendi.