Lectura Rumantscha

David Truttmann

Duess jau ir u restar?

Senza dubi, ti enconuschas la chanzun da The Clash: «Should I Stay or Should I Go». Sa chapescha vai en quel song per il dilemma en ina relaziun d’amur: Duess jau restar u duess jau ir? Ma la dumonda spinusa han deplorablamain era stuì sa far ils davos mais ils abitants e las abitantas da Brinzauls: Bandunar il vitg per adina? Decider per ina translocaziun definitiva? – Blers han decis dad ir. Ed il parlament chantunal ha approvà mardi in credit da 50 milliuns per sustegnair il «Go».

Chalar u surdar?

Da manar ina fatschenta ora en las regiuns è savens ina gronda sfida. Quai cumprova l’exempel da la Pasternaria Caduff a Glion (foto). La branscha dals «pecs» è insumma sut squitsch, damai che mintga kiosc e mintga grossist venda oz paun. A Hubert Caduff (63) – al sulet pasterner a Glion – na vegni betg a restar bler auter che da serrar sia fatschenta al mument da sia pensiun. Però i dat era cunterexempels che dattan speranza, ma betg en la branscha dals «pecs»: Tar la Scrinaria Flepp a Mustér surprenda il figl il manaschi dal bab. La quintessenza pudess pia esser: Il lain funcziuna, il paun vegn dir.

La bella vista lungurusa

Insatgi m’ha ditg ina giada ch’ils balcuns torts vi da las chasas engiadinaisas sajan cucheras per glieud ch’ha mirveglias. E pelvair, ils balcuns torts n’èn mai stads be simpels ornaments architectonics. Els eran adina cucheras per esser al current, per guardar tge che marscha al bigl. Quai ha er ditg l’architecta Cilgia Salgeber envers la FMR: «Minchün vulaiva vzair da chesa oura che chi gira lo.» Ed oz? – Blers balcuns torts guardan vers il sulegl. Quai è segir ina bella vista, ma atgnamain ina lungurusa.

Dal rest, per glieud ch’ha mirveglias cun set ureglias datti ina buna nova cuchera: la Lectura Rumantscha!