Lectura Rumantscha
FMR
La mort pertutga mintga uman – tai e mai. Pli veglia che jau vegn, fatsch era jau mes patratgs davart la fin da mia vita: Simplamain viver – forsa cun temas e dolurs – fin che la mort vegn u far in suicidi assistì?
Suicidi assistì – in tema fitg dispitaivel
A Mustér han mardi saira plirs referents discussiunà davart il suicidi assistì en instituziuns pajadas dal maun public, per exempel en chasas da tgira. La raschun: Il Chantun vul introducir ina lescha che duai sfurzar talas instituziuns da lubir suicidis assistids en lur chasas. Ils parairis van dapart: Tgi metta las collavuraturas e collavuraturs respectivamain las conabitantas e conabitants en il center da la dumonda, tgi la persuna sezza che vul murir.
In da sis en il lotto per Corin Curschellas
La cantautura Corin Curschellas ha dacurt retschet il premi da la Fundaziun J. E. Brandenberger dotà cun 200 000 francs. La surpraisa era gronda, sco ch’ella raquinta en l’intervista cun la FMR. Quai saja sco in da sis en il lotto. «Jau era adina da l’opiniun che jau saja la suletta che sappia propi tge che jau haja fatg tut en mia vita», di Corin Curschellas. Ussa sappia ella dentant che anc auters sappian tge che saja capità ils davos 50 onns.
In zichel Vienna a Lavin
Il Hotel Linard a Lavin tschertga dapi questa stad insatgi che surpigliass la gestiun, ma senza success. Per surmuntar l’enviern ha Hans Schmid, mainagestiun actual da l’hotel e president da la Pro Linard SA che posseda l’immobiglia, instradà in café viennais en il Hotel Linard. Il «Café Bazzi» na sa basia dentant betg be sin sia passiun per Vienna, di Hans Schmid, mabain pudess esser in concept per la gestiun futura.
A revair e bun divertiment cun la Lectura Rumantscha!
Gust da leger dapli?