Lectura Rumantscha
FMR
Oz vai per regurdientschas e memorias. Quai tuna profund e pensiv. Ma magari èsi tut banal e profan. Silmain tar mai.
Regurdientscha 1: Peter Müller al Lauberhorn
Tgenina è tia emprima regurdientscha vi dad ina cursa da skis? – Tar mai èsi stà la victoria da Peter Müller il 1980 al Lauberhorn. Quels ch’èn intgins onns pli vegls sa regordan forsa anc dal duel da Bernhard Russi e Roland Collombin. Quel è mort venderdi passà. In terz collega skiunz da quel temp è stà Walter Tresch. Quel abita oz a Lantsch e sa regorda dal «furbaz» Collombin.
Regurdientscha 2: In num per in festival
Avant prest 30 onns avevan las uniuns da giuventetgna en Val Müstair organisà concerts da rock a Valchava. Jau era en il comité d’organisaziun. La pli gronda lavur era bunamain stada da chattar in num per il festival. Nus vulevan insatge rumantsch. Quella idea ha era gì ina cumpagnia da Tersnaus en Lumnezia. Els han dà num a lur arranschament «Buatsch Festival». L’uniun purtadra – la «Uniun Lidimer» enturn Leander Albin – ha organisà questa fin d’emna il «Buatsch» per la tschintgavla giada. Ma danunder vegn quel num insumma?
Regurdientscha 3: En memoria dad Andri Gritti
Ed er a Sent avevan Andri Gritti e sia dunna Gianna Bettina vulì dar paisa a la lingua rumantscha, cura ch’els han organisà l’emprima giada lur festival musical a Sent. Els han numnà quel: Festival «Cun sal e paiver». Il capo-organisatur Andri Gritti è mort quest enviern. Ma questa fin d’emna ha il festival tuttina gì lieu – en sia memoria.
Regurdientscha 3: Battesta ed Angela
Jau ma regord anc bain da la ferventa amur tranter il Lumnezian Battesta e la Tessinaisa Angela! Avant otg onns, durant las vacanzas en Frantscha, hai jau legì «Il cavalè della Greina» da Toni Halter. Tge tragedia a la fin … Tge, ti has uss era survegnì gust da leger in text da Toni Halter? Bainprest vegn republitgada si’entira ovra.
E sche ti ta dumondas forsa ussa: Co aveva lura insumma num quel festival da rock en Val Müstair, il matg 1999? – Quai poss jau gugent ta tradir: il «Rockinval». El ha gì lieu mo ina giada!
Gust da leger dapli?