Lectura Rumantscha
FMR
La davosa Lectura Rumantscha avant Nadal e cunquai in pitschen «regal» ordavant che va bain a prà cun las proximas emnas: Hotels, nagina naiv e patratgs davart las festas.
Nagins hotels en mauns esters
Adina puspè cumpran persunas estras in hotel en Svizra, tge che procura mintgatant tar la populaziun per protestas. Il cusseglier naziunal da Berna Ueli Schmezer ed anteriur moderatur da l’emissiun «Kassensturz» vul restrenscher quellas cumpras. El vul schlargiar la Lex Koller che limitescha fin ussa be las venditas da chasas privatas a persunas da l’exteriur era sin hotels. Il president da l’associaziun d’hotellaria grischuna Ernst Wyrsch è d’in auter avis: «Nus stuain esser engraziaivels, sche nus pudain insumma mantegnair l’infrastructura dad hotels e ch’i vegnia er investì.»
Pretschs adequats per paucas pistas?
Jau na sun anc betg ida cun skis. E ti? Has chattà in pau naiv? Probablamain artifiziala. La pauca naiv ha natiralmain consequenzas per ils territoris da skis, er a Savognin. Dacurt ha il Tages-Anzeiger crititgà gist quella regiun: Per paucas pistas avertas saja da pajar memia bler. Quai vesan las pendicularas auter e decleran, daco ch’il maletg dal Tages-Anzeiger ch’ins «paja in entir paun, ma survegn be in mez« na constettia betg.
La truscha ed ils regals disturban
Nadal stat davant porta. Has ti gia preparà tut e cumprà tut ils regals? U has anc in stress da far tut las lezias fin ils 24 da december? Gist quella truscha e la massa da regals disturban bleras persunas, sco ch’ina retschertga da la FMR en Surselva mussa. Il bel saja dentant dad esser en cumpagnia. Quai quasi il resun da Nadal da tuts e tuttas.
Bun divertiment cun la Lectura Rumantscha tranter regals e fondues e bellas festas da Nadal!
Gust da leger dapli?