Lectura Rumantscha
FMR
Digren da chavriels
En Surselva stagnescha la populaziun da chavriels sin in bass nivel. Quai mussa il rapport davart la planisaziun da chatscha dal chavriel che l’Uffizi da chatscha e pestga dal chantun Grischun ha publitgà l’october 2025. Il motiv sajan ils effects dal strentg enviern 2017/18 ed ils gronds animals da rapina, il luf ed il luf-tscherver. Da temair per la populaziun na saja dentant betg: il chavriel vegnia a frida fitg spert cun novas situaziuns ed haja in grond potenzial da reproducziun, uschia Patrizio Decurtins da l’Uffizi da chatscha e pestga dal Grischun.
Abitaziuns cooperativas cun agid da la vischnanca
La Societad d’abitadi Lantsch vul porscher spazi d’abitar pajabel. In emprim project cooperativ ha ella gia realisà. Uss ha ella planisà in segund project a Lantsch cun quatter chasas ed en tut 29 abitaziuns per 22,5 milliuns francs. L’emprim vuleva la societad cofinanziar quel project cun vender intginas abitaziuns, ha dentant midà avis per evitar che gist quellas abitaziuns vegnian objects da speculaziun. Tschertgà agid ha la societad tar la vischnanca. Lezza vegn a decider il mardi davart in credit da 3,4 milliuns francs.
Trais dunnas per la Regenza
La gievgia passada ha la Partida populara svizra nominà Valérie Favre Accola sco candidata per las elecziuns da la regenza grischuna l’auter onn. Il verdict era cler: Ella ha recaltgà 170 da 225 vuschs, ses adversari Walter Grass be 50. La surpraisa saja stada gronda, ha ditg la nova candidata. Cun ella sa preschentan fin uss era Nora Saratz Cazin ed Aita Zanetti per la successiun da cusseglier guvernativ Jon Domenic Parolini. «Jau sun loscha che nus avain per il mument en il Grischun dapli candidaturas da dunnas che dad umens, quai è bain istoric», ha ditg Valérie Favre Accola.
A revair e bun divertiment cun la Lectura Rumantscha!
Gust da leger dapli?