Lectura Rumantscha

Il fil cotschen da la Lectura Rumantscha dad oz furma la colur cotschna, ma quella procura plitost per chaus cotschens en nossas tematicas.

La fasa cotschna

Sco tar l’ampla da traffic suonda suenter la fasa cotschna l’oranscha e lura la verda – e lura hai num ir. Exact quai capita uss er a Brinzauls, ma in pau pli imprevisibel che tar l’ampla. Suenter lungas discussiuns da translocaziuns mida in pau andetg oz venderdi la fasa da cotschen en oransch e la populaziun da Brinzauls dastga puspè turnar e durmir en lur chasas a Brinzauls. Ed a partir da glindesdi vala la fasa verda ed ina e scadin po puspè visitar Brinzauls. E quai pudess era restar uschia, betg sco tar l’ampla che mida previsiblamain puspè sin cotschen.

Las cifras cotschnas

In milliun francs damain svieuta che la stagiun vargada – quai è ina detga summa. Pervia da mancanza da naiv n’han las Pendicularas da Mustér betg pudì avrir a Nadal e Bumaun tuttas pistas ed era betg tuttas ustarias. Quai ha procurà per cifras cotschnas, uschia ch’els han fatg la dumonda da lavur curta sco anc tschintg auters manaschis turistics grischuns.

Las strias cotschnas

Ussa da tschaiver è ella puspè da vesair cun sia scua e vestgadira forsa cotschna – la stria. Quella figura ha sias ragischs dentant en in chapitel trist da l’istorgia europeica. Antonia Bertschinger perscrutescha la persecuziun da strias en il Grischun. I dettia dentant anc bler da retschertgar, di ella.

Las undas cotschnas

Durant che jau scriv quella Lectura Rumanstcha datti mintgatant undas cotschnas sut in pled. E lura èsi da midar insatge, perquai che jau hai scrit fauss il pled. «Spell­checker» ha num quel program che ma gida a scriver senza sbagls. E dapi quest’emna curregia il program era texts sursilvans.

A revair e bun divertiment cun la Lectura Rumantscha!