Lectura Rumantscha

Bun di! Sche ti vuls savair tge che marscha a Lü-Lüsai, lura es ti en il dretg lieu.

«Nus essan era anc qua!»

Jau giess enorm gugent ina giada a Lü-Lüsai. Questa pitschna fracziun da la vischnanca da Müstair ha circa 50 abitants. E sin las fotografias vesa quai ora sco l’idilla totala. Ma halt! A Lü-Lüsai vegni era discutà e politisà! Ina gruppa d’interess cun il num «Nus da Lü-Lüsai» s’engascha dapi l’avust passà per ils interess da las abitantas e dals abitants. «Nus vulain simplamain render attent che nus essan era anc qua e guardar che nus na vegnian betg emblidads», di l’anteriur president communal Severin Luzzi.

Grischun: Votar senza pass svizzer

Savevas ti, ch’ins sa era votar senza pass svizzer sin livel communal? E che il Grischun è in dals chantuns, nua che quai è lubì en relativamain blers lieus Per esser pli precis: en 34 da las totalmain 100 vischnancas. Ma uschè simpla n’è la participaziun politica per esters lura tuttina betg, per il pli ston las persunas avair vivì intgins onns en il medem lieu.

Davos las culissas

Tranteren legel jau gugent purtrets da persunas che lavuran davos las culissas. Ina dad ellas è Corsin Clopath da Trin. Sco manader per il salvament e da pistas sin il territori da skis da Flem Laax Falera porta el ina gronda responsabladad – e resta per regla invisibel. Sch’i capita lura però in accident, sto el esser svelt sin il post. Ed uschia è el adina puspè era confruntà cun la mort, sco quai ch’el ha ditg en l’artitgel.

Bun divertiment cun la Lectura rumantscha!