Lectura rumantscha

Senza mesiras na vai betg

Sentas ti anc adina la fora da schaner en la bursa? – Lura n’es ti betg il sulet u la suletta che sto strenscher in pau la tschinta e prender mesiras l’onn 2026. Era la Societad per credits a l’agricultura dal Grischun ha in problem cun la liquiditad. Tranter auter reducescha ella damai la summa dals novs credits per sia clientella per 10 %. Forsa fiss in tagl sumegliant er ina buna mesira per tai?

Senza «boomers» na vai betg

Igl è in «boom» che procura per lavur als «boomers» – ils pitschens projects da fotovoltaica sin fatschadas e tetgs sursilvans. Sco ch’il cumpossessur da l’interpresa Beer Bigliel a Mustér, Adrian Bigliel ha ditg, na fissi numnadamain betg pussibel da satisfar la dumonda en il sectur da la fotovoltaica senza la lavur da pensiunaris (e temporars). I manca era qua il persunal. Sch’ils «boomers» avessan be fatg uschè blers pops sco quai ch’i giavischan ussa panels solars, pudessan els laschar lavurar ils pli giuvens.

Senza patins na vai betg

In «boom» n’hai entant betg mo dà en Surselva, mabain er en l’Engiadina a Sent. En la fracziun da Sur En da Sent è numnadamain la via da glatsch daventada in vair magnet turistic grazia a milliuns da views en las medias socialas. Durant la stagiun auta hajan ins dumbrà fin a 500 – 600 giasts en in di. In tal record n’è entant betg be d’engraziar a las medias socialas, mabain er ad ina buna reserva da patins.

Bun divertiment cun la Lectura Rumantscha!