In rintg da salvament per il spital

​Salas plainas questa mesemna saira en Engiadin’Ota. En nov dad indesch vischnancas è vegnì votà davart in nov plan per salvar e garantir silmain a curta e media vista il provediment da sanadad en la regiun. Las radunanzas communalas han gì per part participaziun da record, sco p.ex. a Samedan cun 429 votantas e votants.

Dapi mais è la SGO, la fundaziun purtadra dal provediment da sanadad en l’Engiadin’Ota, en la breduglia finanziala. Duas emprovas da pavlar la SGO cun nova munaida e da reorganisar il provediment da sanadad en la regiun han fatg naufragi l’onn passà en votaziuns communalas.

Tuttas bunas chaussas èn trais

Ils resultats da la votaziun da questa mesemna èn lura prest stads «sovietic». Per part hai dà decisiuns unanimas en las nov vischnancas ch’han insumma votà. Ussa po vegnir fundada proximamain la Sanadura, ina nova societad da dretg public che duai administrar e surdar prestaziuns en il sectur da sanadad, sco p.ex. la gestiun da l’Ospidel Engiadin’Ota, las chasas d’attempads u ils servetschs da la spitex. En tut vegnissan la gestiun e la reorganisaziun a custar a las vischnancas totalmain 19,55 milliuns francs – e quai mo per quest onn 2026.

La sanaziun da l’entir sistem è necessaria, perquai che la SGO sa chatta, suenter il naufragi da votaziun dal november passà, en in moratori. A l’organisaziun van ora ils raps fin la fin da mars 2026.

In salvament a curta vista

Cun ina emprima cunvegna da prestaziun vegn ussa garantì il provediment medicinal grazia a la collavuraziun cun l’Ospital chantunal dal Grischun e cun la Clinica Gut a San Murezzan. Quella cunvegna duai ir en vigur l’entschatta d’avrigl ed esser valaivla fin la fin da l’onn 2026. A lunga vista ston però vegnir elavuradas novas cunvegnas da prestaziun, saja per l’ospital, ma era per auters servetschs da sanadad.

La decisiun da questa mesemna è pia bain stada in «rintg da salvament» urgent per per salvar a curta vista il spital ed auters servetschs medicinals en la regiun. Co ch’il provediment vegn dentant organisà en avegnir, quai sto pir vegnir elavurà ils proxims mais.

Damai persunal e damain prestaziuns

Malgrà il signal positiv da questa mesemna tras il suveran d’Engiadin’Ota, vegn la reorganisaziun dal sistem da sanadad en Engiadin’Ota ad avair consequenzas gravantas: 48 persunas perdan a la fin da mars lur plazza da lavur. A medem mument vegnan era reducidas intginas prestaziuns. Per la paja pon vegnir mantegnids auters servetschs sco p.ex. la traumatologia u l’oncologia.

La decisiun a favur da la Sanadura e per las novas cunvegnas da prestaziun è ussa crudada en nov vischnancas da l’Engiadin’Ota ed è pia definitiva – malgrà che Zuoz e San Murezzan voteschan pir l’entschatta mars. Per dar il culp da partenza a la reorganisaziun duvravi in GEA en set dad indesch vischnancas – e quellas stuevan represchentar silmain 50 % da la populaziun da l’Engiadin’Ota. Quellas duas cundiziuns èn vegnidas cuntanschidas mesemna saira.