Lectura rumantscha

«Bler füm e pac rost»

Tant’attenziun n’ha ina sesida dal parlament dad Ilanz/Glion anc mai sveglià. Il gremi communal ha gì visita questa mesemna saira dad ina sessantina da giasts, tranter auter da medias da l’entira Svizra. La raschun: la tirada «virala» dad avant duas emnas dal president communal Marcus Beer encunter seniors e petiziunarias. E tge è resultà en la sesida parlamentara? Per rumantsch ladin din ins: «Bler füm e pac rost!» E per sursilvan datti er in verset sumegliant cun «bahaultscha» e «caultscha». Pli prudent èsi da leger ussa il rapport dad Augustin Beeli che n’è betg stà l’emprima giada ad ina sesida parlamentara a Glion. Cuntrari a ses collega dal Blick.

Glieud sco stailas a Vaz?

Tgenin è il pli famus lido da quest mund? – Probabel èsi quel da Venezia. Ma enconuschentamain è la citad en la laguna confruntada cun plirs problems. In da quels: il overtourism – glieud sco stailas. Ma bainprest survegn Venezia concurrenza da Vaz. Il suveran da la vischnanca decida l’entschatta da mars, sch’el vuless consentir in credit da prest 6 milliuns francs per realisar in nov lido sper il Heidsee. Ed effectivamain datti glieud che tema che Vaz pudess daventar in nov Venezia!

Ils stgazis en bibliotecas ed archivs

Il mund rumantsch è (per fortuna!) er in mund da bibliotecas ed archivs. Quellas instituziuns èn ils stgazis dal savair e la memoria collectiva dad ina cuminanza. Ina persuna che ha tgirà durant 45 onns ina biblioteca communala è Elisabeth Poo da Sent. Schegea che tar sia emprima lectura sco uffant tegneva ella sutsura il cudesch! E forsa che Elisabeth Poo prenda per mauns proximamain il cudesch «archiv» dad Asa Hendry che gudogna in da nov Premis da litteratura svizzers.

Ed insumma: buna lectura cun la Lectura Rumantscha!