Lectura Rumantscha

La Lectura Rumantscha reparta oz aur, argient e bronz, natiralmain be simbolic e senza valitaziuns, perquai che la finala han tut ils temas da la lectura merità dad esser sisum il podest.

Plaz 1 – sigls e biera

Èsi ussa stà la 20alva ediziun u betg? Il speaker dal «Local Hero» na sa regorda betg pli exact. Las festas suenter la concurrenza mintga onn sajan stadas memia grondas, ha el manegià cun in surrir. Ma la finala è quai tuttina. Er a l’ediziun da quest onn hai dà ina vaira festa da sigls e schrubas en l’aria cun skis e snowboard, ma eba er ina sper pista cun biera, hotdogs e musica.

Plaz 2 – pendicularas e milliuns

Qua in pèr milliuns, là in pèr milliuns. Las pendicularas Breil Vuorz Andiast han gia survegnì ina massa raps dad investurs. Ils daners paran dentant anc adina da mancar sco la naiv sin pista. Per surviver duvrassan las pendicularas ina pulita summa da plirs milliuns. Ma nua ir per tut? Las pendicularas han gia ina schliaziun: tar la vischnanca.

Plaz 3 – simplamain Tarcisi

El è simplamain sa numnà Tarcisi. Dapli n’hai era betg duvrà. Il rest han sias ovras d’art raquintà. Tarcisi Cadalbert, oriund da Sevgein è mort l’onn 2003, ha malegià aquarels da la muntogna e la natira sursilvana. Ovras fin ussa nunenconuschentas èn da vesair en ina nova exposiziun a Glion.

Bun divertiment cun la Lectura Rumantscha, nua che tuttas e tuts èn victurs!