Lectura Rumantscha

Spetga in amen! Jau hai gist preparà l’apero da la Lectura Rumantscha. Nagut na dastga mancar per ch’ina sentupada da cumpagnia gartegia.

Las bavrondas

Il pli impurtant per in apero da vaglia è natiralmain il vin, e quai sa er il Chantun. Perquai conserva el intginas buttiglias en ses tschaler statal en la Chasa grischa. Ma tge pomai baivan Martin Bühler e cumpagnia cun lur visitas uffizialas? Bordeaux, Merlot u Riesling-Sylvaner? La FMR ha svelà il misteri. Uschè bler saja tradì: Il vin è alv e cotschen.

Las buccadinas

Sper il vin na dastga betg mancar la spaisa. Ina buccadina cun in frestg toc paun da la pasternaria allegra mintga osp. Ma gist quella ingredienza impurtanta vegn bainprest a mancar a Mustér: La davosa pasternaria en il vitg serra numnadamain l’atun. Toni e Renata Goldmann n’han chattà nagina successiun. Suenter trais generaziuns da «pecs» va quella èra a fin.

Las baterladas

Sche las buccadinas mancan, lura ston almain ils discurs constar durant l’apero. Qua sa segir Heini Hemmi contribuir ad ina u l’autra sgnocca. L’anteriur skiunz professiunal ha gist avant 50 onns gudagnà ina medaglia dad aur als gieus olimpics ad Innsbruck. Quai era lura ina vaira surpraisa – e natiralmain oz in vaira stgazi dad anecdotas.

Bun appetit e bun divertiment cun l’apero da la Lectura Rumantscha!