Lectura Rumantscha

La levada da Pasca

E lura, co has ti mangià tia lieur da tschigulatta? L’emprim las ureglias u las chommas? La dumonda decisiva è però plitost: Tge fas ti ussa cun tut ils ovs cotgs en frestgera danvanz da Pastgas? Forsa has ti fatg ina spassegiada sin la senda botanica a Schnaus, nua che Ueli e Cecilia Giger han zuppà 220 ovs. Il tip dad oz avess uschiglio ina buna idea co duvrar quels ovs che ti has forsa chattà tar la spassegiada. E lura anc ina autra buna nova, betg per ils ovs, mabain per las giaglinas sezzas: Ellas dastgan finalmain giudair ils radis da sulegl or en il liber. Dapi igl 1. d’avrigl èn las mesiras cunter la grippa d’utschels abolidas. Sper tschigulatta ed ovs ha Pasca pia era purtà in pau dapli libertad.

Nua èn las dunnas?

Jau sun ina dunna, schurnalista e 48 onns veglia. Cun mia annada correspund jau quasi exact a la media da las candidatas e candidats che sa mettan si per las elecziuns dal Cussegl grond il zercladur. Quai è però era gia tut. Dunnas èn tar tschertas partidas quasi da tschertgar cun la marella. E las professiuns che domineschan èn scolast u pura u interprendider. Sco candidata fiss jau ina veritabla exota, danor cun mes paucs chavels grischs.

Nepal, Nigeria e New York

L’inschigner Leo Condrau è stà ils onns settanta per sia lavur a Nepal, Nigeria e New York. Da quel temp aventurus ha el fatg bleras fotografias ch’el expona actualmain a Trun.

Bun divertiment cun la Lectura Rumantscha ed ils relicts da Pasca!