Lectura Rumantscha

Las novitads internaziunalas èn plainas cun cumbats: La guerra en l’Iran u en l’Ucraina, battostas tranter ils democrats ed ils republicans en ils Stadis Unids da l’America e bleras autras dispitas sin quest mund. Er en la Lectura Rumantscha datti inqual cumbat, ma en ina rom pitschen.

Ils Gals grischuns

Tuttas vischnancas da l’Engiadin’Ota han ditg GEA a Sana­dura – tuttas? Na, ina ha cuntinuà il cumbat cunter l’organisaziun dal provediment da sanadad. Quai è ussa però istorgia. Dapi mesemna saira han er ils Asterixs ed Obelixs dal Grischun ditg GEA a Sanadura.

Lungas «uras da chombra»

En Surselva è la purschida dal traffic public vegnida engrondida: Dapi il december 2025 porschan la Retica ed Auto da posta in tact da mes’ura tranter Glion e Cuira e Glion e Mustér. Quai procura dentant per lungs temps da preschientscha e paucas uras pajadas tar ils manischunzs d’auto da posta. Critica cunter las «uras da chombra» sa dasdan.

Ina runda sin il glatsch

En in senn figurativ èsi in cumbat: La Skateline Alvra a Surava ha stuì serrar, ed ussa duai ina nova Skateline Alvra a Bravuogn porscher glatsch per patinadras e patinaders sin in percurs circular dad 1,4 kilometers lunghezza. I vegn segir ad esser in cumbat cunter il clima.

L’organisatur da 120 scolars e scolaras

Cumbats cun scolaras e scolars n’ha Thomas Wäspe betg en quel senn. Forsa però mintgatant cun ils uraris da scola e l’entir manaschi ch’il mainascola da Lumnezia ha da diriger. Sco ch’el ha declerà, è in punct essenzial en sia lavur: «Ti stos esser ferm en organisar, igl è la basa da quel post.» Dapi l’onn da scola 2025/26 maina el la scola cun 120 scolars e scolars a Vella e Cuschnaus cun talent d’organisaziun.

A revair e bun divertiment cun la Lectura Rumantscha!