Bell’ora, blera glieud e buna glüna

«L’ora es simplamaing bomba!» Uschea haja tunà sur fin d’eivna da duos visitadurs dürant l’Agrischa a Zernez, discurrind e spettond insembel in lingia per lur tschiainder. E quai as poja propa pretender cun buna conscienza. La bell’ora es dal sgüra stat ün dals facturs principals chi ha pisserà per ils millis e millis da visitaduras e visitadurs la fin d’eivna passada a Zernez, e per fatschas trasoura cuntaintas ingio chi’s guardaiva. E quai na be pro la fuolla da giasts, dimpersè natüralmaing eir pro’ls organisaturs.

Zernez: per duos dis center da l’agricultura grischuna

«Nus eschan ourdvart cuntaints. L’ora es propa statta fenomenala, tuot oter co l’ultima Agrischa a Zernez. Quai güda natüralmaing üna pruna da ragiundscher precis quella atmosfera cha nus laivan eir preschantar dürant quists duos dis a Zernez», declera Fadri Stricker, il president dal comitè d’organisaziun da l’Agrischa 2026 tuot inchantà. E cun nus manaja il paur da Sent las ses societats da paurs da las valladas dal Süd insembel cun seis raduond 500 agüdantas ed agüdants lavurius chi sun stats in acziun dürant l’intera sonda e dumengia passada. Davo divers mais cun preparaziuns intensivas e suot il motto «divers ed autentic» han passa 15 000​ giasts visità l’exposiziun agricula grischuna chi vala i’l sectur d’agricultura sco ün dals puncts culminants da l’on.

Ün vast program per üna e minchün

Ed ils numerus giasts nun han be pudü giodair la bell’ora, dimpersè ün program vast per üna e minchün. Quai davent dad exposiziuns, preschantaziuns e concurrenzas da vachas da lat, vachas mamma, chavals e muvel manü, sur ün cortegi cun in tuot 15 fuormaziuns e societats, stands da marchà ed expositurs d’interpraisas localas e d’utrò, fin a trategnimaint da musica e chant dürant il di e la saira e bler daplü.

Ün grond success tenor ils organisaturs, perche cha quint as faiva avant l’occurrenza cun raduond 10 000 visitaduras e visitadurs. Ma cha güsta tanta glieud haja fin l’ultim chattà la via a Zernez saja simplamaing «fantastic», manaja Fadri Stricker fond bilantsch e dond resposta a la dumonda che chi’d es insomma lura stat seis highlight persunal da la fin d’eivna. «Sco allevatur da vachas brünas da lat ha meis cour battü natüralmaing il plü ferm per l’exposiziun da vachas da lat. Eu n’ha eir perseguità online adüna darcheu che chi viagia in quella tenda. Nus vain eir gnü vachas in concurrenza ed eir quia possa far ün bilantsch positiv.» Cha da cleger oura ün highlight cun ün tal program nu saja bod na pussibel, cha plaschair til fetscha però simplamaing d’avair vis tantas fatschas cuntaintas. E quai na be giasts da tuot il Grischun, ma eir ils vaschins da las regiuns cunfinantas.

Posa davo 15 ons

Però malgrà il success, l’Agrischa – l’exposiziun annuala da l’agricultura grischuna chi vain organisada minch’on in ün’otra regiun geografica i’l chantun Grischun – fa prossem on üna posa d’ün on. Cha davo 15 ediziuns saja uossa dad ir üna jada sur ils cudeschs, haja nom davart l’Uniun paurila grischuna (guarda eir l’intervista). Cha l’Agrischa tuorna però il plü tard fingià darcheu i’l 2028 a Cazis.