«L’Agrischa es üna festa chi s’ha etablida e perquai dess ella eir cuntinuar»
L’Agrischa a Zernez es statta ün success. Sur 15 000 persunas han visità l’exposiziun agricula grischuna chi vala i’l sectur d’agricultura sco ün dals puncts culminants da l’on. Malgrà quist success, davo la 15avla ediziun fa l’Agrischa üna posa. Che chi sun ils motivs e co cha l’avegnir da l’exposiziun guard’oura, quinta il mainagestiun da l’Uniun paurila grischuna Sandro Michael in ün’intervista.
L’Agrischa chi’d es gnüda organisada fingià per la 15avla jada e chi vala sco ün dals puncts culminants da l’on i’l sectur d’agricultura, fa üna posa dürant il 2027. Chi saja üna jada dad ir sur ils cudeschs – ouravant tuot quai chi pertocca il concept da sponsoring – manaja il mainagestiun da l’Uniun paurila grischuna Sandro Michael. L’agronom es daspö raduond quatter ons in quista funcziun e fa eir part dal comitè d’organisaziun da l’Agrischa. Uschea sco ch’el quinta in ün’intervista as giavüscha l’uniun impustüt üna megldra cunvegna cun seis sponsurs. La part dal sponsoring importa nempe bod duos terzs dal büdschet total da circa ün mez milliun francs ed es pervi da quai ourdvart significhanta per l’occurrenza.
FMR: Co Til ha plaschü l’Agrischa 2026 a Zernez fin uossa?
Sandro Michael: Eu stögl dir, quist’Agrischa es statta fin uossa grondiusa, dad A fin Z. Cumanzà culs preparativs, sur la fich bun’atmosfera i’l comitè d’organisaziun e cun quista bell’ora, speraina sün üna fin d’eivna da bellezza. E fin uossa es tuot sco giavüschà.
Da che s’allegra El il plü fich quista fin d’eivna?
Meis highlight persunal es propa da pudair verer tuot quista fuolla da glieud cuntainta dapertuot – quia sül prà ed in tuot las tendas. Lur algrezcha es la paja per tuot las fadias cha’l comitè d’organisaziun ha gnü dürant l’ultim on.
Dapertuot glieud cuntainta e listess, Vus da l’Uniun vais decis dad interrumper l’Agrischa per ün on e far üna posa. Perche?
Nus vain gnü bainschi adüna gronda furtüna cull’ora dürant ils ultims pêr ons e vain ladavo eir adüna pudü serrar giò fich allegraivel quai chi pertocca la vart finanziala da l’Agrischa. Però nus vain eir ponderà che chi capita, scha l’ora nu vess dad esser üna jada da nossa vart. Scha quai füss il cas, schi vessan nus da portar ün ris-ch finanzial massa grond. Perquai vulaina dovrar quist on da posa per ir üna jada sur ils cudeschs e provar uschea da minimar quist ris-ch cun evaluar il concept da finanziaziun amo üna jada da fuond sü. E cunquai cha’ls contrats cun noss quatter sponsurs principals scroudan eir quist on, es quist güsta üna bun’occasiun per far tuot in d’üna. Nos böt es da pudair cuntinuar culla buna collavuraziun e cun quists sponsurs, ma in avegnir cun üna tscherta sgürezza da deficit.
Che per consequenza ha quist on da posa per l’Agrischa?
Eir quia vulaina dovrar il temp per evaluar che chi ha funcziunà bain quists ultims 15 ons e che forsa main bain. E lura, eventualmaing tour tschertas masüras correspundentas. Nus vain bainschi fat üna retschercha pro nossas commembras e commembers ed eir surgni il resun cha la majorità es tuot in tuot cuntainta cul concept actual da l’Agrischa, però i vala listess la paina da far ponderaziuns per l’avegnir. E per gnir amo üna jada inavo sülla dumonda perche cha nus vain decis da far üna posa, es il motiv il seguaint: I nu füss simplamaing na stat pussibel da far tuot quists sclerimaints dürant ün on d’organisaziun ordinari.
Uschea cha quist nun es la fin per l’Agrischa sco chi’s tilla cugnuoscha?
Insomma na, güsta l’incuntrari. L’Agrischa es üna festa chi s’ha etablida fich ferm dürant ils ultims ons pro la populaziun e nus vulain eir cuntinuar cun ella. Quia as tratta plütöst dad inviar tschertas müdadas illas structuras internas da l’organisaziun e main illa festa sco tala. Perquai dess l’Agrischa in ün turnus da tschinch ons eir in avegnir darcheu avair lö minch’on in tschinch differentas regiuns in nos chantun. Ed eir quai chi reguarda l’intent da quista festa, dess tuot restar sco fin uossa. L’Agrischa dess eir in avegnir esser quell’exposiziun agricula in Grischun chi renda noss’agricultura plü visibla e palpabla ad ün public plü vast. Quai lura darcheu a partir dal 2028 a Cazis e cun gronda probabilità lura eir darcheu suot il nom Agrischa.
L’intervista cun Sandro Michael es gnüda fatta in sonda a mezdi dürant la festa da l’Agrischa.
Gust da leger dapli?