Lectura Rumantscha

«Novs Spagnols» per Danis-Tavanasa

Na, i na va betg per l’Uniun sportiva Danis-Tavanasa u insumma ballape, mabain per in’uniun quasi numalina, la Societad da musica Danis-Tavanasa. Quella ha cumprà novs instruments che derivan per gronda part da Xirivella en Spagna. Ils «novs Spagnols» na remplazzan pia nagins Caduffs u Cathomas sin la plazza da ballape, mabain inqual instrument gia isà en salas da concert. L’emprima giada sa preschentan ils «Spagnols» dal reminent ils 24 da matg.

Il sun da l’Engiadina

Rock, pop u hip hop? – Sche jau stuess chattar il sun da l’Engiadina, fiss jau en pitgiras. Ma jau na sun era betg cumponist e n’enconusch era betg bain avunda la regiun. Auter è quai tar Lorenz Weber. Il cumponist, pianist e paster da Berlin è sa fatschentà intensivamain cun il sun da l’Engiadina. Quai per chattar il dretg «soundtrack» per il film «Fexer» che purtretescha in ferrer da la Val Fex.

Ina massa dumondas

Da far pops è relativamain simpel. L’esser geniturs è persuenter tant pli grev e po procurar per massa dumondas. Per gidar giuvnas mammas e babs porschan spendreras sco Prisca Collenberg-Bivetti da Lumbrein perquai sustegn avant e suenter la naschientscha. Sco che la mamma da quatter uffants ha ditg envers la FMR, dovria dentant er ella mintgatant agid per surmuntar muments critics.

A revair e bun divertiment cun la Lectura Rumantscha!