Donn per quest bel job

Ma entaifer diesch onns han gist quatter secretaris bandunà la Lia Rumantscha. Quai è donn e putgà per il team cun tut sias linguistas e ses promoturs regiunals che lavuran cun engaschi cumplain. Las midadas a la testa chaschunan malsegirezza e consumeschan energia e schlantsch. Uschia perda la pli impurtanta instituziun rumantscha prestige.

E pertge banduna insumma in secretari suenter l’auter la Chasa rumantscha? Ina raschun pudess esser stada la recrutaziun sbagliada. Ils ultims secretaris generals èn vegnids preschentads sco managers u administraturs a chaschun da lur elecziun. Ma la Lia Rumantscha n’è betg in concern cun tschients da collavuraturs e na dovra nagin manager. Er in administratur n’è betg necessari per las circa 20 plazzas cumplainas.

En pli èn vegnidas elegidas aposta persunas dad ordaifer la «petta rumantscha». Quests novizs han l’emprim ina giada stuì emprender d’enconuscher la structura da la Lia Rumantscha cura ch’els han cumenzà sco secretaris. Els han l’emprim stuì emprender da chapir la Rumantschia cun tut sias particularitads e ses differents idioms.

Il mender è stà: Cun evitar dad eleger insatgi da la «petta rumantscha» han ins tschernì persunas cun plitost pauc entusiassem. Igl èn stadas persunas che han scuvert lur amur per lur lingua materna – u paterna – magari pir a partir da quel mument che la plazza da schef è stada scritta ora.

Gliez è donn e putgà. Atgnamain fiss il secretari gea il pli bel job en Rumantschia. Per quel job na dovri nagin manager e nagin administratur che tschertga fin tar sia pensiun anc in’occupaziun pulit pajada. I duvrass finalmain ina persuna cun curaschi ed entusiassem. Gliez fiss almain ina buna basa da partenza.