Ina directura ch’enconuscha l’ABC schurnalistic
Igl è ina buna nova per il mund da medias rumantsch. Ina schurnalista cun gronda experientscha sa metta a la testa dad RTR. Simona Caminada ha cumenzà sia carriera sco praticanta da La Quotidiana e percurrì bleras staziuns redacziunalas fin a la correspundenta dad SRF a Roma. Tgi che guarda la «Tagesschau» enconuscha sia fatscha.
La nova directura sa co ch’ins raquinta istorgias – saja quai davart la primministra taliana Giorgia Meloni, da fugitivs a Lampedusa u da la populaziun en l’Italia che suffrescha da chaliras.
Ella sa co svegliar l’attenziun d’in aspectatur, tschiffar ina auditura, captivar in lectur per pitschnas e grondas novitads. Ella sa co ch’igl è da lavurar a la front, far buns rapports, far vivas reportaschas. Questa chapientscha profunda ha mancà ils ultims onns sin il pli aut post dad RTR.
Cun Simona Caminada pon auditurs ed aspectaturas sperar sin in svilup positiv da las emissiuns da radio e televisiun e da chanals digitals. Ils schurnalists e las redacturas a la front ed en las regiuns san en l’avegnir che la persuna che sesa sin la sutga da directura chapescha ils fastidis ed era ils plaschairs da la clamada. Quai fa bain ad RTR.
Il settember cumenza la dunna ch’è creschida si a Castrisch sia nova incumbensa. Ella baratta il microfon cun la batgetta. Sco directura dad RTR sesa ella er en la direcziun da la SRG SSR sut il timun da Susanne Wille.
Là, en las etaschas pli autas dal concern da medias svizzer, regia memia savens in pensar tecnocratic. I vegn communitgà cun pleds vids che nagin na chapescha davart abstractas transfurmaziuns sempiternas. Era a quest gremi fa ina dunna da la pratica sco Simona Caminada pli che mo bain.
Gust da leger dapli?