Simona Caminada surpiglia timun
La nova directura dad RTR ha num Simona Caminada. La correspundenta dad SRF turna questa stad da Roma a Cuira. Las spetgas èn grondas. L’elecziun da la Sursilvana è succedida unanimamain en il cussegl d’administraziun da la SRG SSR.
La tensiun è stada gronda en la chasa da medias rumantscha. Dapi emnas è vegnì speculà: Tgi occupescha en l’avegnir la sutga directoriala dad RTR? In um u ina dunna? Ina persuna externa u insatgi da la chasa? Fin la gievgia a bun’ura nagin che saveva. Gliez è bunamain ina miracla en vista al fatg che RTR è plain schurnalists mirveglius e redacturas che na fan l’entir di nagut auter che retschertgar.
La gievgia vers las diesch l’avantmezdi è finalmain arrivada la novitad: «Simona Caminada daventa directura dad RTR.» En ils corridors e sin las stgalas da la chasa da medias èsi stà da vesair fatschas rientas e levgiadas. Plirs collavuraturs e collavuraturas dad RTR enconuschan la futura directura anc sco collega da lavur. Ils aspectaturs dad SRF l’enconuschan sco correspundenta da Roma en la «Tagesschau».
Da Roma enavos a Cuira
Simona Caminada (39) è creschida si a Castrisch. Sia carriera sco schurnalista ha ella cumenzà sco praticanta tar La Quotidiana. Lura ha ella lavurà sco freelancera tar la Südostschweiz e fatg stages tar RTR – tut quai sper il studi.
La schurnalista ha in bachelor en publicistica, communicaziun e scienzas da film da l’universitad da Turitg. Il master en schurnalissem ha ella terminà il 2010 a Hamburg. La Sursilvana ha lavurà tar il schurnal regiunal dad SRF e rapportà da Schaffusa, da Turitg u sco correspundenta da televisiun dal Grischun. L’onn 2022 è ella ida a lavurar per SRF a Roma.
Ella possedia «ina profunda chapientscha per tut ils geners da medias», saja quai medias digitalas, radio u televisiun, èsi scrit en la communicaziun da la SRG SSR. Simona Caminada è maridada, ha in uffant e sa chasescha questa stad cun sia famiglia a Cuira.
Pli datiers a la glieud ed a la giuventegna
Las spetgas èn grondas. «Sco nova directura vegn Simona Caminada a nizzegiar pli intensivamain il potenzial publicistic da RTR ed a purtar il program anc pli datiers al public», scriva la SRG SSR. Ella vegnia a dar attenziun speziala a la giuventetgna.
«La midada digitala decida, sche nus cuntanschain noss public er anc damaun», vegn citada Susanne Wille, directura generala da la SRG SSR en la communicaziun. Simona Caminada haja il curaschi d’empruvar novas chaussas.
«Precis questa tenuta duvrain nus per sviluppar RTR vers l’avegnir digital e per dar impuls a tut la SRG SSR. Ella è la dretga persuna per gidar a concepir questa midada», è persvadida Susanne Wille.
Vincent Augustin accentuescha sco president da l’uniun purtadra dad RTR la derivanza da la nov-elegida: «Simona Caminada ha qua sias ragischs, ella enconuscha ils umans e las regiuns e sa tadlar e construir punts.»
Simona Caminada entra en funcziun il settember. Sco directura dad RTR fa ella era part da la direcziun generala – il gremi strategic da la SRG SSR, presidià da Susanne Wille.
Sa legrada «mega fitg»
In maraton d’intervistas ha Simona Caminada absolvì la gievgia. Era a la FMR ha ella dà pled e fatg.
FMR: Tge è stà Voss emprim patratg cura che Vus avais udì che Vus essas elegida?
Simona Caminada: Jau sun ma legrada mega fitg da turnar enavos en il Grischun ed en la chasa RTR, nua ch’jau hai cumenzà avant prest ventg onns a far televisiun. Da pudair surpigliar responsabladad per RTR ed il service public – l’emprim patratg è stà, tge bellezza sfida!
I dat grondas spetgas. Vus duais sviluppar l’avegnir digital per RTR e quai duai lura dar impuls era per las autras unitads da la SRG SSR.
Questas spetgas èn qua. Jau cumenz l’emprim da settember e vegn l’emprim a discurrer cun blers e bleras en la chasa RTR. Jau less udir las visiuns dals collavuraturs e da las collavuraturas. Qua datti ina massa schurnalists e schurnalistas che han ideas. Ensemen cun els vi jau sviluppar il futur modern e digital per la chasa RTR. Nus giain sco team en quest futur.
Igl è da spargnar. Fa quai quità a Vus?
Quai è ina sfida. La politica ha decidì che la SRG SSR stoppia spargnar. I stattan a disposiziun 270 milliuns pli pauc a partir dal 2029. Anc uss na poss jau betg dir, tge che quai munta per RTR.
Entras il process da transfurmaziun «Enavant SRG SSR» ston schefs e scheffas che lavuran gia daditg tar RTR s’annunziar danovamain per plazzas. Tge pensais Vus da quai?
Questa decisiun ha la SRG SSR prendì per l‘entira interpresa. Las plazzas da superiurs èn vegnidas scrittas ora en l’entira interpresa per vesair, tgi che ha insumma interess. Per part èsi era novas plazzas cun novas incumbensas. Nus vulain avrir il process e dar la schanza a mintgin e mintgina da s’annunziar.
Tge stat a cor a Vus?
Jau vegn da la publicistica e less metter paisa al potenzial publicistic dad RTR. Nus essan la vusch ed ils egls da la SRG SSR en il Grischun. Là ves jau potenzial per far cun ils collavuraturs e las collavuraturas in program anc pli datiers da noss public. Impurtant è era dad esser datiers dals giuvens e da las giuvnas. Jau enconusch RTR gia dapi mattatscha. Durant gentar eri da star mur airi e tadlar novitads. Jau less ch’era las novas generaziuns hajan questa pussaivladad. Perquai stuain nus daventar pli moderns, pli digitals ed esser là nua che la glieud è oz.
Gust da leger dapli?