Lectura Rumantscha

Tgi che tschertga, chatta. Quai tuna uschè simpel. Ma da chattar n’è betg adina tant simpel, malgrà ch’ins tschertga e tschertga. Oz tschertg jau gia l’entir di mia ura da bratsch, cumprada avant dus dis …

Tschertgà: candidatas e candidats

Es ti da Scuol ed avessas ti mustgas da candidar? La vischnanca da Scuol sto numnadamain ir en tschertga da candidatas e candidats per divers gremis communals: suprastanza, cussegl da scola e cumissiun sindicatoria. Da totalmain 19 posts ston nov vegnir occupads frestg. Pertge gist tants? E surtut pertge vegnan elegidas quellas autoritads pir ils 18 d’october e betg en connex cun il termin da votaziun federal dals 27 da settember 2026? Nus dain las respostas.

Tschertgà: flurinas e flurettas

Enconuschas ti il araldin nanin? U forsa la lantschetta alpina? Per mai è quai chinais! Cun ir en muntogna guard jau plitost sin la pizza che per terra. Là chattass jau forsa quellas fluras. Ma i dat persunas che giaudan dad ir a documentar la flora alpina – e surtut la «flora raetica». In project actual va a la tschertga da tut quellas flurinas e flurettas en l’entir Grischun. En l’entir Grischun? I dat inqual differenzas tranter las regiuns.

Tschertgà: in sandwich

Has ti forsa era gia chattà – spassegiond per las muntognas – in rest dad in sandwich? E sajas sincer: Has ti forsa era gia bittà davent la paletscha da tes salsiz? – Retschertgas en l’aua da la Greina han cumprovà che quella aua alpina cuntegna DNA da portgs. Portgs sin la Greina? Èsi forsa in rest da tes salsiz? Nus tradin anc auters detagls da quel project da studi che sa numna Alpex.

Tschertgà: aua, aua, aua

Ma insatge sai jau segir: L’element il pli tschertgà è aua! I regia gist ina brava sitgira – e surtut la prada, las alps ed il guaud en Surselva pateschan. Da chattar aua n’è gnanc uschè simpel, sch’ella na vegn betg giu da tschiel.

Buna tschertga cun la Lectura Rumantscha. E horca, sche ti avessas da chattar mi’ura da bratsch – grazia fitgun!