Lectura Rumantscha

Igl è la stagiun per ir a spass, per ir sin ils auts. E perquai pos ti oz vegnir cun mai da piz a chantun, per trutgs e pitgognas, per munts e vals.

Ina spassegiada cun la derschadra

Per entschaiver giain nus cun il tren fin a Casti. Da là davent faschain nus ina spassegiada vers la baselgia carolingica da Mistail. Pertge che nus viandain gist vers quella baselgia? Perquai che mia collega Claudia Cadruvi ha era fatg quest’emna precis quella spassegiada, però cun instrucziun dad ina guida professiunala: Tanja Pfammatter da Lantsch. Ella n’è betg mo guida da viandar, ma actualmain surtut presidenta da la Dretgira regiunala Alvra.

La sutga da Cungieri

Per betg strapatschar memia ferm, prendain nus ussa la sutgera per ir amunt – quella da Sedrun si Cungieri. Gea, ti has raschun, quella sutgera n’exista betg pli. Avant passa 20 onns era ella vegnida demontada. Oz passa ina pendiculara suren en direcziun Mustér. Però dacurt ha mia collega vis en il Verkehrshaus a Lucerna – perstgisa, en il «Museum Svizzer da Transports» – ina veglia sutga da Cungieri. Quai ha sveglià en ella reminiscenzas d’in vegl trauma.

Sche pleds e purtrets «as palaintan»

Es ti insatgi che vul discurrer durant viandar? U perfin chantar? U plitost taschair? A la magistra e neo-poetessa Nina Dazzi da Zuoz giran – durant ir a spass – pleds e poesias en testa. E lura sto ella scriver si quels maletgs. Ils davos onns ha ella per fortuna scrit si numerus vers e maletgs che «as palaintan» durant sias spassegiadas. Quest’emna preschenta ella numnadamain ses emprim cudesch cun 68 poesias.

La turtina en il satgados

Però ussa basti, faschain marenda! In vair Grischun ed ina vaira Grischuna ha adina en il satgados in toc turta da nusch. Quai è il meglier pavel energetic per ir en muntogna! In da numerus producents da turtas da nusch è Reto Schmid da Sedrun. Sia «La Conditoria» producescha dentant a l’engronda. Al mument lavura l’interpresa tuatschina mordio, perquai ch’i dat in nov deal cun in grond detaglist en Germania. Reto Schmid dovra pia blers satgados per transportar tut quella marenda en Germania.

Buna marenda, buna spassegiada e buna lectura!