Lectura Rumantsch

Tut ha ina fin, saja quai il curs da rumantsch a Glion, il campiunadi da «highline» a Laax u ina lunga carriera sco mazler. Be la liongia ha duas.

Anc adina a Glion

Questa fin d’emna è il 57avel curs da rumantsch sursilvan ì a fin en la claustra da Glion. En tut han 124 persunas, uffants e creschids, participà a quel – in dumber ideal tenor il manader dal curs Conradin Klaiss. Ma betg mo pervia da quai saja il curs da quest onn stà il meglier insumma. Era la secretaria Carmelia Arias Linares-Giger haja contribuì il ses. En l’avegnir è quest curs dentant confruntà cun eventualas midadas. I n’è numnadamain betg cler, quant ditg ch’el ha anc lieu en la claustra da Glion.

Anc in sport da nischa

Chapaivlamain è il sport da «highline» anc in sport da nischa. Da ballantschar sin ina suga en in’autezza da passa 20 meters sur il plaun, quai n’è franc betg in’activitad per ina e mintgin. Gea perfin il pli spert Svizzer en questa disciplina, Ramun Tomaschett (28) da Cumbel, ha gì da cumbatter cunter la tema tar si’emprima cursa da «highline». Entant è il scrinari però in dals megliers dal mund. Al campiunadi mundial a Laax ha el fatg il 10avel rang en la disciplina da speed.

Anc in maister da liongias

Cura ch’i va per la liongia, n’è Marcus Fried betg be in veteran. Na, il mazler da Tarasp è in vair maister. 48 onns ha el lavurà en questa branscha e sa damai ch’i dovra blera experientscha per producir ina liongia d’auta qualitad. «La charn n’è betg adina tuttina. Quai ston ins sentir – e lura adattar», ha el explitgà envers la FMR. Dal reminent vegn Marcus Fried pensiunà questa stad. Ina u l’autra giada vegnia el tuttina anc a gidar en mazlaria. Sco la liongia ha pia era la carriera da Marcus Fried duas fins.

A revair e bun divertiment cun la Lectura Rumantscha!