Lectura Rumantscha

Las temperaturas èn anc adina sco da mesa stad. Tuttina hai num per las scolaras e scolars grischuns: Pachetar il turnister ed ir a scola.

La scola schubra spetga

En tut il Grischun vali pia: Levar! Ir a scola! Tgi che n’ha però betg fatg grondas vacanzas da stad sco ils uffants èn ils pedels Othmar ed Ursina Lutz-Schmed. Per il pèr è la stad la stagiun auta cun schubregiar manidlamain mintga chantunada da la scola a Mustér. Uss èn els, che han cumenzà gist la primavaira quella nova lavur, dentant pronts da retschaiver ils uffants.

Badugn enstagl plastic

Glion ha inaugurà il venderdi passà ina plazza da ballape da badugns. Ma betg avair tema, ils ballapedists dal turnier d’inauguraziun han pervi da las plantas schon anc vesì la balla. Ils badugns sa chattan numnadamain en furma da granulat tranter il pastg artifizial, para in novum en Svizra. Quella tocca lascha ruschnar ballas, giugadurs e giugaduras sco sin pastg natiral. Da sperar èsi ch’i na creschia betg bainbaud brumbels da badugn or dal pastg artifizial.

L’aua duess tanscher

I na po e po simplamain betg plover endretg. E lura hai anc dà l’enviern passà pauca naiv. Ina constellaziun fatala per ils lais da serra en Svizra. Tenor la ElCom, la Cumissiun federala d’electricitad, n’èsi dentant betg anc da far quitads. L’atun sappia anc plover avunda, uschia ch’ils livels dals lais da serra possian anc crescher. Speranza, betg che nus stuessan leger anc la Lectura Rumantscha da stgir.

A revair e bun divertiment cun la Lectura Rumantscha!