«Il crap è grond»
Gievgia ha il president communal Daniel Albertin – sche la situaziun a Brinzauls n’avess betg da pegiurar – manà sia davosa saira d’infurmaziun en chaussa. 27 giadas ha el dà pled e fatg en talas occurrenzas, nua ch’i vegniva infurmà tranter auter davart privels, evacuaziuns e dischlocaziuns en connex cun Brinzauls.
Suenter questa davosa infurmaziun ha RTR tschentà quatter dumondas al president communal da la vischnanca Albula/Alvra. Sin entschatta dal 2027 vegn el a surdar ses uffizi a Manuela Gebert.
RTR: Questa è stada previsiblamain la davosa saira d’infurmaziun sco president communal dad Albula/Alvra en connex cun la bova da Brinzauls. Quant grond è il crap ch’è dà giu da cor ussa?
Daniel Albertin: Jau poss schon dir: Il crap è grond. Jau hai manà en tut 27 sairas d’infurmaziun e nus avain gì sairadas da differenta tempra. Ma da l’autra vart avain nus savens sentì – sco oz – ch’ins vegn purtà da la populaziun e da las persunas pertutgadas, malgrà tuttas sfidas e difficultads ch’ins sto dumagnar. Quai fa plaschair. Ma ussa, suenter quests circa otg onns lavur intensiva cun Brinzauls èsi schon in levgiament ch’igl è ussa stà la davosa infurmaziun en chaussa.
Tgenina è stada per Vus la pli greva da questas 27 differentas sairas d’infurmaziun?
Jau hai gì duas sairas fitg grevas ch’èn restadas en memoria. Per l’ina è quai stà quella infurmaziun, nua che nus avain stuì communitgar il matg 2023 che nus stuain evacuar il vitg. Fin lura avain nus adina be exercità e mess sin palpiri tut ils scenaris, cun la speranza da betg stuair duvrar in bel di tut quai. Ma cura che jau hai propi stuì communitgar per l’emprima giada che nus stuain evacuar in entir vitg, lura è quai stà grev. In’autra greva situaziun è stada la nova, curt avant ina saira d’infurmaziun, da la mort da Markus Feltscher. El era stà directur da l’Assicuranza d’edifizis dal Grischun. Cun el avevan nus collavurà stretg en connex cun Brinzauls.
Emoziuns hai dà era questa saira – cun applaus e perfin cun standing ovation per Vus.
Quai ha sa chapescha fatg plaschair, sch’ins survegn gist en connex cun ina tala situaziun tendida tuttina anc ina standing ovation. Qua fiss segir mintgina e mintgin stà commovì. Quai dat satisfacziun e curaschi ch’ins haja tuttina fatg insatge endretg en connex cun questa sfida da Brinzauls.
Vegnan forsa perfin a mancar a Vus en l’avegnir da questas sairas?
En ina moda u l’autra vegnan ellas segir a mancar. Suenter mes uffizi da president na vegn jau betg pli a savair tut e survegn distanza da tuttas infurmaziuns. Perquai vegni segir ad esser curius. Ma da l’autra vart van segir puspè avertas novas portas per pudair m’engaschar. (rtr/fmr)
Gust da leger dapli?