In virus che fatschenta
Rodund tschunconta puras e purs ein separticipai alla radunonza generala dall’Uniun purila Surselva il venderdis vargau a Mustér/Salaplauna. In niev virus, 600 servelas ed in referat da Peter Vincenz dil Plantahof ein stai silla gliesta da tractandas.
Alla radunonza generala dall’Uniun purila Surselva (UPS) a Mustér il venderdis sera ein circa tschunconta persunas stadas presentas. Era Marcus Caduff, il minister d’economia, ha anflau la via el Center sursilvan d’agricultura a Salaplauna.
El plaid introductiv ha il president dalla UPS, Silvan Caduff, fatg attent alla greva situaziun dall’agricultura: «La schitgira ha ferm enta pugn nus, quella stad vegn a schar anavos fastitgs. Da quellas situaziuns cull’aura vegnan era ad occupar nus ils proxims onns, il management dall’aua sto vegnir organisaus.»
In virus che fa la fuera
Plinavon ei era in virus – il orthobunyavirus – sederasaus en Surselva. Cun quella infecziun survegn la biestga la fuera e dat negin ni mo pli pauc latg. «Il mument eis ei aunc buc aschi biars tiers ch’ein pertuccai dil virus, mo quei savess semidar tut tenor il svilup dall’aura», ha declarau Silvan Caduff als presents ed allas presentas. Il virus sederasi cun in insect.
600 servelas e referat
La politica naziunala fatschenta medemamein ils purs e las puras. Sandro Michael, il meinafatschenta dall’Uniun purila grischuna, ha informau davart diversas tematicas. Aschia vegn actualmein debattiu enteifer l’uniun da purs svizra davart il contract da Mercosur che duei facilitar igl import da products sidamericans. Il davos plaid seigi leu aunc buca plidaus. Sisum l’agenda stat era l’iniziativa d’alimentaziun che vegn la fin fevrer 2027 avon il pievel. «Nus vegnin cun ina campagna proximamein a reparter 600 servelas a Cuera per perschuader il pievel da votar encunter l’iniziativa».
In «giug da casa» ha Peter Vincenz giu alla fin dalla radunonza. En in cuort referat ha igl um ch’ei oriunds da Mustér raquintau da sia lavur sco directur dil Plantahof. Treis puncts seigien ad el specialmein impurtonts. Per l’ina tedlar tier bein als purs ed allas puras, cunquei ch’els enconuschien la pratica. Per l’autra duei il Plantahof esser in post da cussegliaziun per tut ils purs, dil pur grond entochen quel che tegn mo in pèr cauras. E sco punct final metta Peter Vincenz ina prioritad sill’educaziun: «Igl ei da scolar bein la proxima generaziun, quei ei enorm impurtont», ha el concludiu. Suenter la part ufficiala han ils purs e las puras terminau en cumpignia la sera cun in apero gustus.
Gust da leger dapli?