Commentari: Temps da dir «tschüss» all’opposiziun

«Tschüss SanaSurselva» – quei han las vischnauncas da Laax e Schluein detg la fin digl onn vargau. Sin agen giavisch han ellas bandunau la corporaziun da vischnauncas e renunziau a lur delegai e la vusch da lur suveran. Dapi quest onn ein Laax e Schluein perquei mo pli commembers passivs, per aschidadir. Pertgei pagar pagan els tuttina pil provediment da sanadad en Surselva.

Ch’ils presidents da Laax e Schluein s’expriman tuttina davart las fatschentas dalla SanaSurselva ei pia bein capeivel ed era lur dretg. Mo sch’ei vulan ver in plaid en caussa, daco insumma extrar? Sch’ins pretenda gnanc in onn suenter l’extrada ina votaziun dil pievel, alla quala ils agens votants e votantas savessen tuttina buca separticipar, fa quei secapescha surstar.

En vesta d’ina eventuala votaziun all’urna fuss ei pia nuot auter che consequent da turnar anavos ella SanaSurselva – premess che las pretensiuns da Laax e Schluein hagien buca giu autras intenziuns che «mo» ina votaziun dil pievel. Tgisà?

E schiglioc fuss igl andament dallas proximas jamnas daus. Mo ei drova silmeins a Schluein in agir speditiv. Cheu stuess ina radunonza communala decider enteifer gnanc in meins, sch’ei vulan turnar ella SanaSurselva. Ed a Laax? Cheu duvrass ei schizun mo ina confirma ch’ins ei aunc commember. En quei cass stuess la suprastonza communala denton admetter che l’extrada ei stada nunvaleivla e da ver fatg in sbagl.

Cun in «beinvegni» anavos ella corporaziun – seigi quel lu cordials ni buc – savessen Schluein e Laax denton quintar. Ha gie la suprastonza dalla SanaSurselva sezza proponiu da far quei pass. Suenter in cuort intermezzo egl exil fuss ei perquei in bien mument da dir «tschüss» all’opposiziun.