«Il public da l’Engiadina Bassa es fich fidel»
Fingià per la deschavla jada visiteschan las musicistas e musicists culla Festa Stradivari l’Engiadina Bassa. L’occurrenza da musica da chombra es intant dvantada ün’occurrenza da tradiziun illa regiun. Cha la deschavla visita nu sarà dal sgüra na statta l’ultima, tradischa l’intendanta da la Festa Stradivari Maja Weber.
Quai chi ha cumanzà dal 2017 cun ün singul concert da chombra dal Quartet Stradivari i’l Chastè da Tarasp, s’ha intant sviluppà ad ün’occurrenza annuala e da tradiziun sur plüs dis cul nom Festa Stradivari. Cun ün viadi musical tras las quatter stagiuns han ils organisaturs festagià quist on lur deschavla ediziun. Quai cun quatter concerts sur quatter dis l’eivna passada da marcurdi fin sonda a Guarda, i’l Scuol Palace, illa baselgia refuormada a Scuol e per finir i’l Chastè da Tarasp.
In occasiun dal giubileum ha la cellista dal Quartet Stradivari, producenta, intendanta e musicista da la Festa Stradivari Maja Weber (52) laschà reviver il passà, quintà perche ch’ella tuorna minch’on adüna darcheu gugent in Engiadina Bassa e tradi che ch’ella as giavüscha pel avegnir da la Festa Stradivari.
FMR: Avant desch ons ha il Quartet Stradivari concertà per la prüma jada i’l Chastè da Tarasp. Daspö là es il chastè dvantà ün dals lös fixs i’l program. Uschea eir quist on cul concert da finischun in sonda passada. Co d’eira quai per Ella da pudair conclüder l’occurrenza da giubileum precis in quel lö ingio cha tuot ha cumanzà?
Maja Weber: Quai es stat natüralmaing ün mumaint grondius e festiv per nus tuots. Il Chastè da Tarasp es ün lö ourdvart special ed ün bain cultural chi nu’s chatta uschè svelt ün seguond. Per dir la vardà, nu rivessa gnanca da m’imaginar la Festa Stradivari sainza il Chastè da Tarasp. E per quist on m’haja allegrada pustüt pel concert i’l chastè. Nus vain nempe laschà scriver intuorn las quatter stagiuns da Tschaikowski – oriundamaing ün toc da musica per clavazin – bel ed aposta in üna versiun pel orgel i’l Chastè da Tarasp. Davo desch ons esa simplamaing üna jada stat ura e temp ch’eir quel orgel possa gnir miss in scena. Eu d’eira be buonder ouravant ed il resultat es stat amo meglder co spettà.
La Festa Stradivari es be ün’occurrenza da plüssas otras ch’Els organiseschan dürant tuot il decuors da l’on e tras tuot la Svizra. Che significha per Ella in quel cas insomma l’Engiadina Bassa?
Eu cugnuosch l’Engiadina fingià da plü bod e per mai es quista regiun simplamaing üna regiun d’amur. Nus tuornain minch’on adüna darcheu fich gugent quia a Scuol e contuorns ed ans sentin adüna eir fich bainvis e dachasa. Quista jada cun ün zich plövgia in marcurdi passà, ma quai nun es uschè mal. Nus vain nempe eir fingià gnü naiv üna o tschella jada (ria). E quai chi fa ouravant tuot grond plaschair, es il fat cha’l public da l’Engiadina Bassa es fich fidel e grat. Fin l’ultim eir perquai cha nus surgnin ün ferm sustegn da la vart dal cumün da Scuol ed eir da la vart da plüs hoteliers quia illa regiun. Pustüt ils hoteliers sun daspö ons la gronda pozza da quist’occurrenza. Els spordschan a lur giasts pauschalas cumbinadas cun noss concerts, üna sporta dal rest magara particulara chi nu dà in oters lös.
Quant Stradivari cuntegna la Festa Stradivari insomma amo, schi’s sa cha dal 2019 han Els stuvü dar Lur instrumaints da Stradivari chi vaglian per part plüs desch milliuns francs darcheu inavo a la fundaziun possessura?
Eu n’ha pudü far musica sur 20 ons cun quists instrumaints e sun fich grata per quist temp. Cler, cha’l prüm mumaint as faja forsa impissamaints co chi sarà lura da far musica sainza quists instrumaints prezius. Però eu stögl dir cha quai nu giova absolutamaing ingüna rolla. Eir uossa vain nus instrumaints fich prezius chi sun per part sur 300 ons vegls e lur cling riva da tegner püt a quel dals instrumaints da Stradivari. E be per dir, il public nun ha neir reagi negativ dürant tuot quists ultims ons. Anzi, eu n’ha il sentimaint cha nus vivain e rapreschantain la ierta da Stradivari intant in möd plü intensiv co plü bod e cha tant il Quartet Stradivari sco eir la Festa Stradivari meritan sainza dubi plü co mai quist nom.
Uschea cha per la Festa Stradivari haja nom via libra eir per l’ündeschavla ediziun?
(ria) Intant cha’l public es bainvugliaint, sper eu cha l’Engiadina Bassa resta ün punct fix i’l chalender eir pel avegnir. Quist’occurrenza es per nus musicistas e musicists nempe ün grond giodimaint. Pustüt la relaziun intima cul public ed il barat tanter pêr davo ils concerts es ün inrichimaint unic per nus e quai am giavüscha fich chi resta eir per las prosmas ediziuns.
Gust da leger dapli?