Las quatter stagiuns ün pa oter

Il Quartet Stradivari nun es cuntschaint be in Svizra, ma eir sur cunfins. Il quartet as cumpuona da Xiaoming Wang (violina), Stefan Tarara (violina), Lech Antonio Uszynski (viola) e Maja Weber (violoncello). La Festa Stradivari in Engiadina Bassa ha gnü lö quist on per la deschavla jada e pussibiltescha als musicists ed a la musicista da Stradivari dad interpretar lur musica cun grondas emoziuns in üna cuntrada genuina ed in monumaints culturals istorics. Ils concerts stan eir in connex cun inscunters persunals in ün’atmosfera famigliara. Quist on ha il quartet concertà in marcurdi a Guarda, in gövgia e venderdi a Scuol ed in sonda a Tarasp. Il Quartet Stradivari vain sustgnü da la Società «StradivariCIRCLE» per progets da Stradivari d’interess public per amaturs da musica da chombra sco evenimaints in atmosferas specialas.

Concert i’l Hotel Scuol Palace 

La FMR ha visità il concert dal Quartet Stradivari cul titel «Las quatter stagiuns da Buenos Aires» i’l Hotel Scuol Palace a Nairs. La musicista ed ils musicists han preschantà cumposiziuns dad Astor Piazzolla cullas stagiuns stà, utuon, inviern e prümavaira. In seis salüd al principi dal concert ha Lech Antonio Uszynski orientà ch’els hajan stuvü adattar ed arrandschar las quatter parts chi sun scrittas per oters instrumaints. Il resultat da lur arrandschamaints es stat surprendent ed ha muossà impreschiunantamaing la virtuosità da la musicista e dals musicists.

Per uraglias adüsadas vi da musica da pop e schlaghers es quai stat ün obstacul plü grond cun musica pretensiusa. Dissonanzas vuglüdas cun strattas da tuns süls instrumaints a corda insü ed ingiò, cun solos e plüchar, passaschas lomas, ma eir plü düras ed adüna eir cun müdamaints dal ritem. Pro Astor Piazzolla as tratta d’ün cumponist e sögliader dal tango nuevo revoluziunà, voul dir tango tradiziunal cun elemaints da jazz e da musica classica cun essenzas da tango cun cuntrapunct e cun armonias cumplexas. Il quartet ha interpretà cun sias pussibiltats instrumentalas ed ha inventà cun quai las quatter stagiuns da Piazzolla in ün möd bod revoluziunar.

Ün pêr ulteriuras üettas da Piazzolla

Davo las quatter stagiuns da Piazzolla ha il quartet sunà amo diversas üettas dal cumponist plü cuntschaintas chi giaivan bain in uraglia. Eir quella part hana sunà cun grond savair e cul dun d’interpretaziun cha’ls protagonists han sunà cun bler plaschair e cun ardur. Las preschaintas ed ils preschaints han muossà lur plaschair cun grond applaus ed han passantà üna sairada chi restarà a blers amo lönch in memoria.

Ils musicists e la musicista

Xiaoming Wang es nat dal 1982 in China ed ha stübgià musica al conservatori da Peking ed a Vienna pro Gerhard Schulz. Daspö l’on 2008 es el Konzertmeister da la Filarmonia da Turich. Stefan Tarara es nat dal 1986 a Heidelberg, s’ha scolà pro Zakhar Bron a Turich ed ha surgni distincziuns internaziunalas cun sia violina. El es eir docent al conservatori da Berna. Lech Antonio Uszynski es nat dal 1986 in Italia in üna famiglia da la Pologna ed es gnü instrui dad Ana Chumachenco e da Zakhar Bron. Daspö il 2023 ha el üna professura al Royal Conservatoire a Den Haag. Maja Weber 1974 es nada in üna famiglia musicala ed ha fat ils stüdis a Winterthur ed a Köln. Seis caracter musical ha ella surgni dad Isaac Stern, Walter Levin, Paul Katz ed oters. Ella ha pudü tour in consegn grondas distincziuns pro concurrenzas a Genevra, Londra, Bubenreuth ed a Graz. Dal 2007 ha ella fundà il Quartet Stradivari ed al listess mumaint ün’impraisa da musica culla gruppa Stradivari.