Il chaun morda – il nurser sto star botta
In nurser da Scuol sto pajar ina multa perquai ch’in chaun da protecziun ha mors in auter chaun. En pli sentenziescha la Procura publica il nurser ad in chasti pecuniar cundiziunà cun temp d’emprova da dus onns. La FMR ha dumandà invista en il mandat penal, l’uschenumnà «Strafbefehl» che declera en detagl il schabetg sin la Motta Naluns.
La chaussa è capitada l’atun passà sin la Motta Naluns sur Scuol. Ina damaun morda in chaun da protecziun in auter chaun – in chaun dal raz basset. L’avrigl da quest onn condemnescha la Procura publica il nurser ad ina multa ed ad in chasti pecuniar cundiziunà. Il nurser sto purtar ils custs da la procedura.
La summa precisa ch’il nurser ha da pajar, na resorta betg dal mandat penal che la FMR ha survegnì da la Procura publica. Ils nums da persunas e las summas èn tenschidas a nair. Ils nums dals chauns n’èn dentant betg anonimisads.
Nessie pertgira l’emprima giada sia scossa
Tge ch’è capità precis l’atun 2025, descriva la Procura publica sin ina pagina: Ina damaun lascha il nurser pascular tranter 350 e 400 nursas sur l’ustaria La Motta. Quella sa chatta sper la staziun da la pendiculara Motta Naluns sur Scuol. Las nursas pasculeschan libramain, senza saiv.
Il territori n’è betg marcà sco pastgira d’alp cun chauns da protecziun sin las cartas correspundentas (sin map.geo.gr.ch). Ina pastgira marcada avessi dà en il territori Mot da l’Hom, trais kilometers en il vest.
Plirs chauns gidan il nurser da pertgirar sia scossa. Per l’ina èsi trais agens chauns – dus border collies ed in raz maschadà. Per l’autra èsi dus chauns-pastur dal raz cangal. Igl èn dus chauns da protecziun ch’èn quel di l’emprima giada tar la scossa. In dals chauns ha num Nessie.
L’emprim fufragnar, lura morder
En il decurs da l’avantmezdi arriva ina dunna cun ses um cun la pendiculara da Scuol sin la Motta Naluns. Els han tar els Ture, in chaun basset cun pail curt. Els spassegian vers l’ustaria. Il nurser pledenta il pèrin. El als fa attent als dus chauns da protecziun ed a la tavla ch’è postada en il lieu. La tavla avertescha da chauns da protecziun.
La dunna metta ses chaun vi da la corda e va vinavant vers l’ustaria. Lura vegnan encunter ad els ruassaivlamain ils dus chauns da protecziun. Nessie fufrogna l’emprim vi da Ture – e dad in mument sin l’auter morda el il basset. La dunna sa sbassa ed emprova da liberar Ture da la gniffa da Nessie.
Ella dat ina pajada al chaun da protecziun e vegn murdida en il maun. Lura reussescha a la dunna da deliberar Ture. Il nurser curra natiers per calmar la situaziun. Ture vegn silsuenter transportà en la clinica d’animals a Scuol, nua ch’el sto vegnir operà pliras giadas. La dunna ch’è vegnida morsa en il maun, desista d’ina denunzia penala.
Set lingias per motivar condemnaziun
Cun set lingias motivescha la Procura publica ussa la condemnaziun dal nurser. Lez «avess gì l’obligaziun da prender mesiras, per ch’il chaun na pericliteschia betg umans ed animals», stat scrit en il mandat penal. Il nurser haja savì che l’ustaria La Motta saja in magnet per turists ed indigens. Tuttina haja el laschà ir ils chauns da protecziun l’emprim di ch’els eran en acziun senza surveglianza en la vischinanza da l’ustaria.
Il nurser n’haja betg impedì che Nessie fetschia «nunnecessariamain ed evitablamain» mal a Ture. Uschia n’haja il nurser betg ademplì sia obligaziun. «Cun l’attenziun duida avess el pudì prevesair ed evitar il schabetg», finescha la procura publica sia argumentaziun.
Tages-Anzeiger ha fatg menziun
Fin uss n’è questa condemnaziun betg stada enconuschenta. Ils 12 da settember 2026 ha il Tages-Anzeiger dentant menziunà cun ina construcziun il cas en ina reportascha davart la situaziun tendida sin las alps en connex cun la preschientscha dal luf, in artitgel cun il titel: «‹Irgendwann kannst du nicht mehr›: Wieso Schweizer Bauern am Wolf verzweifeln». La FMR ha sinaquai dumandà invista en il mandat penal da la Procura publica grischuna.
Gust da leger dapli?