Donn è putgà per questa schanza manchentada
Donn. Il Grischun tutga tar ils chantuns cun la pli veglia populaziun. El avess gì questa fin d’emna la schanza da far ina bella reverenza envers la giuventetgna. Ma cun 67 % han ils votants e las votantas refusà cleramain da sbassar la vegliadetgna da votar sin 16 onns.
Il chantun Glaruna resta uschia il sulet chantun che fida a ses giuvens ed a sias giuvnas dad esser abels da cundecider en la politica chantunala. Cun il NA da questa fin d’emna manchenta il Grischun da suandar ses chantun vischin che gioga ina rolla da pionier.
Il vegliandrament, la uschenumnada «Überalterung», sa manifestescha onn per onn dapli. I naschan paucs uffants ed ina pulita part da la giuventetgna grischuna va a studegiar u ad emprender mastergns insanua auter. Uschia crescha il dischequiliber a l’urna. La giuventetgna è sutrepreschentada en votaziuns davart l’agen avegnir. Las votantas veglias ed ils votants vegls decidan chaussas che n’als pertutga strusch pli.
Deplorabel è il NA anc per in auter motiv. Quasi mintga argument ch’ins fa valair encunter votar cun 16 onns, pudess ins era duvrar encunter il dretg da votar da la generaziun fitg veglia.
Ils giuvens na sajan politicamain anc betg madirs e sa laschian influenzar entras famiglia, scola u medias socialas, è in auter argument. Ma igl è gea anzi fitg bun, sche votaziuns vegnan discutadas en famiglia, en scola e sche giuvens s’infurmeschan en las medias socialas.
Glieud pli veglia che va a votar na discutescha savens cun nagin pli e s’orientescha simplamain vi da las parolas da la partida ch’els suondan gia dapi decennis. È l’influenza dad ina suletta partida propi meglra che las discussiuns en famiglia, en scola e las infurmaziuns en las medias socialas?
Il pli «fasierli» argument è dentant quel che la participaziun a l’urna na creschia betg cun il dretg da votar cun 16 onns. Per la bassa participaziun a l’urna èn responsabels ils votants e las votantas da 18 fin 100 onns. La gronda part dad els ed ellas n’empleneschan betg ora ils cedels da votar. La giuventetgna che vegn sclausa na s’empo nagut da quai.
Per ils proxims decennis è il tema votar cun 16 onns probabel giu da maisa. Speranza na prendan ils giuvens e las giuvnas questa decisiun betg sco signal ch’els n’èn betg respectads e bainvis en il Grischun.
Gust da leger dapli?