Causa «IG Wild beim Wild» encunter RTR

Ina patenta da chatscha sco premi ed ina concurrenza da fotografias da chatscha. Gia dapi onns rapporta Radiotelevisiun Svizra Rumantscha (RTR) davart ils pli differents aspects da la chatscha grischuna. Ins pudess bunamain pretender che la rapportaziun davart la chatscha grischuna tutgia tar il program da RTR, uschia sco quai che la chatscha tutga tar ina da las tradiziuns determinadas en il chantun Grischun. 

L’organisaziun d’utilitad publica per dretgs d’animals «IG Wild beim Wild» crititgescha dentant precis quests formats sco «rapportaziun betg neutrala». Quai è stà da leger en in artitgel dal portal da novitads «20 Minuten» ils 28 da settember 2026. Sco quai che l’organisaziun declera, haja ella inoltrà gist quel di ina reclamaziun tar il post da mediaziun da la SRG.R. «In emettur che inscenescha sajettadas sco gieu dal public e che regala ina permissiun da chatscha n’è betg pli in observatur neutral», haja num plinavant. En pli vul la «IG Wild beim Wild» era purtar plant tar l’Autoritad independenta da recurs davart radio e televisiun (UBI).

Posiziun RTR

«Nossa rapportaziun sa basa sin ils princips publicistics da la SRG SSR: objectivitad, multifaradad ed independenza», declera il schefredactur dad RTR, Flavio Bundi sin dumonda da la FMR. «La chatscha è en il Grischun ina activitad reglada tras lescha cun muntada sociala, culturala, ecologica e politica. Durant la stagiun da chatscha occupa ella ina part da la populaziun e furma in eveniment actual da grond interess public. Perquai fa la rapportaziun davart la chatscha part da l’incumbensa da RTR sco medium regiunal.»

Plinavant declera Flavio Bundi che lur rapportaziun davart la chatscha grischuna da tut ils davos onns na cuntegnia betg mo aspects che tematiseschan la tradiziun e cultura, mabain era dumondas ecologicas ed aspects critics ed etics. Pia saja lur incumbensa «betg da promover u cumbatter la chatscha, mabain da mussar las realitads en tut lur cumplexitad», uschia il schefredactur dad RTR.

Gugent vess la FMR era vulì discurrer cun l’organisaziun «IG Wild beim Wild» en chaussa e dumandar per exempel co ch’ella saja insumma vegnida a tut questas conclusiuns e pertge ch’ella sa decidia gist ussa da far quests pass – surtut savend che RTR rapporta en questa furma gia dapli che 20 onns. La «IG Wild beim Wild» da lur vart n’ha dentant betg vulì prender posiziun renviond a lur posiziun sin ils artitgels e las publicaziuns sin lur pagina d’internet.

Posiziun «IG Wild beim Wild»

E sin quella pagina d’internet inditgada pon ins leger tranter auter il suandant: «In emettur da dretg public surdat ina autorisaziun chantunala d’ir a chatscha, pia la lubientscha uffiziala per mazzar animals selvadis, sco premi da concurrenza. Ins s’imagineschia, sche la televisiun svizra tirass la sort tranter ils aspectaturs per ina patenta d’acquistar armas. Tar la chatscha da hobi vala quai sco tgira d’isanzas.» I seguan plirs alineas nua che l’organisaziun preschenta sia argumentaziun cun frasas sco per exempel: «Nagin policist, nagin schuldà na dastgass posar cun sias unfrendas sco quai ch’ils maletgs victurs da RTR mussan.»

Il schefredactur da RTR Flavio Bundi conceda che critica envers lur rapportaziun da chatscha na dettia «betg pir dapi oz» ed agiunscha: «Quai tutga tiers, gist tar in tema che muventa blera glieud e nua che las opiniuns van per part lunsch dapart. I dat critica constructiva che gida nus da metter en dumonda e sviluppar vinavant nossa lavur. Dasperas sentin nus, sco en bleras debattas da la societad, ch’il tun daventa pli criv e che la chapientscha vicendaivla sa sminuescha.»

Posiziun chatschaders

La «IG Wild beim Wild» na crititgescha dentant betg mo la pratica da RTR, mabain era la chatscha grischuna en general. Sarah Cadotsch, la responsabla per la lavur publica da l’Uniun grischuna da chatschaders da patenta, prenda enconuschientscha da questa critica, ma na vul dentant betg commentar en detagl. En ina posiziun a scrit fa ella a savair tranter auter che la chatscha en il Grischun saja per ina part da la populaziun, «ina part da la realitad da la vita». E ch’i saja perquai era legitim che la chatscha chattia ses lieu en la rapportaziun da RTR.

«Ina purschida da medias da dretg public na sto betg esser concepida ord nossa vista uschia, che tut ils cuntegns correspundan a las opiniuns u als interess persunals da tut las aspectaturas e da tut ils aspectaturs. Gist la diversitad da temas ed interess differents ed era las vuschs criticas fan or ina cuntrada da medias equilibrada. Medemamain na duessan singulas gruppas d’interess betg avair la pussaivladad da prescriver ad in medium ch’è redacziunalmain independent davart tge temas da la societad ch’el dastga rapportar e davart tgenins betg.» Perquai concluda Sarah Cadotsch ch’i na dettia ord punct da vista da l’Uniun grischuna da chatschaders da patenta nagin motiv da metter en dumonda da principi la rapportaziun da fin qua da RTR.

Consequenzas publicisticas?

Ina conclusiun ch’era il schefredactur da RTR, Flavio Bundi tira. «Decisiv n’è betg schebain i dat ina concurrenza u in premi sponsurisà, mabain che la rapportaziun correspundia als standards publicistics. Precis quai è il criteri vi dal qual nus ans orientain. RTR tscherna ils temas tenor relevanza e tenor l’interess dal public, betg tenor ils interess d’ina gruppa specifica. Concurrenzas u participaziuns dal public existan er en blers auters champs da rapportaziun. Ellas na dastgan dentant mai influenzar ils cuntegns redacziunals.»

Sche questa debatta pudess avair ina influenza sin il program futur da RTR, n’è dentant anc betg cler. RTR examineschia e reflecteschia permanentamain sia lavur ed era ses cuntegns schurnalistics. Che la critica actuala vegnia a vegnir discutada ed era reflectada entaifer la redacziun, dentant che la chatscha «en tut sias fassettas resta in tema relevant per il Grischun e cunquai era per RTR». Ed uschia ha lieu tant la concurrenza da fotografias da chatscha sco era la surdada da la patenta da chatscha en il rom usità.