Fotos da predas – emprima protesta
Ina protesta pervi da fotografias da predas n’ha Toni Hess anc mai gì da tractar – fin uss. Il giurist è il mediatur rumantsch da la SRG SSR. Pervi d’in portg mazzà hai dentant gia dà ina giada reclamaziuns. L’emissiun Cuntrasts aveva mussà ina meztga da chasa.
Per mintga regiun linguistica ha la SRG SSR ina atgna «Ombudsstelle», u per rumantsch: in post da mediaziun. Toni Hess è il mediatur che tracta protestas cunter contribuziuns dad RTR. Il giurist giuditgescha independentamain mintga protesta. El è stà pront da respunder intginas dumondas davart ses cas pli actual.
FMR: Avais Vus sco mediatur responsabel per RTR gia survegnì la reclamaziun dad «IG Wild beim Wild»?
Toni Hess: Gea, jau l’hai survegnì.
Tge fa l’organisaziun valair?
L’organisaziun fa valair diversas chaussas. Resumà curt pon ins dir: I vegn fatg valair che la chatscha vegnia en in tschert senn glorifitgada.
Hai gia pli baud ina giada dà reclamaziuns en questa direcziun – che RTR mussa fotografias da predas ed animals morts e premiescha la meglra fotografia?
Na, en connex cun la chatscha n’hai jau anc mai gì in cas. Tge ch’igl ha dà avant radund dus onns: En in film da l’emissiun Cuntrasts davart la meztga da chasa èsi vegnì mussà co ch’in portg vegn mazzà. Là hai dà ina reclamaziun.
Vus avais l’obligaziun dad intermediar. Avais Vus cuntanschì lezza giada ina soluziun?
Jau hai scrit in rapport e sun vegnì a la conclusiun che questa contribuziun dad RTR avant dus onns n’ha betg violà la lescha da televisiun.
Co e cura tractais Vus la reclamaziun dad «IG Wild beim Wild»?
Jau vegn a trametter questa reclamaziun ad RTR, uschia ch’els pon prender posiziun. Era sch’jau na sun betg derschader, mia obligaziun sco mediatur è da tadlar omaduas varts. Suenter che RTR ha prendì posiziun, vegn jau a studegiar la reclamaziun e vegn er a guardar contribuziuns che pertutgan il cas. Lura scriv jau il rapport, sco jau l’hai gia fatg ils ultims onns tar reclamaziuns.
Fin cura avais Vus scrit il rapport?
Tenor lescha hai jau temp 40 dis. E quai tegn jau segir en.
Co vai vinavant, sche l’organisaziun n’è betg d’accord cun Voss rapport?
I po er esser ch’ella è cuntenta cun mias conclusiuns. Ma lain prender il cas che l’organisaziun n’è betg d’accord: Lura ha ella la pussaivladad dad ir tar l’UBI – l’Autoritad independenta da recurs davart radio e televisiun. L’organisaziun na vegn dal reminent betg a far ina protesta encunter mia decisiun tar l’UBI, mabain encunter las contribuziuns dad RTR. Quai è uschia, perquai ch’jau na sun betg derschader, jau sun mo mediatur.
L’UBI decida lura davart la protesta e suenter?
Sche l’organisaziun na fiss lura anc adina betg cuntenta, perquai che l’UBI na dat forsa betg raschun u be parzialmain raschun a l’organisaziun, lura po la decisiun vegnir tratga vinavant al Tribunal federal.
Vus essas dapi radund 30 onns mediatur per RTR. Quants cas avais Vus tractà?
Igl ha dà onns ch’jau n’hai gì gnanc ina protesta e lura onns ch’jau hai gì ina u duas. Ma dapli che duas n’hai jau mai survegnì. Cun auters pleds: Jau hai fitg paucas protestas en connex cun RTR.
Gust da leger dapli?