Cultura cumünaivla sur cunfin

Daspö 20 ons es ella fingià lö d’inscunter ed arrandschamaint fix ill’agenda jaura: La Festa da la racolta a Valchava illa Val Müstair. Ed eir quist on ha la festa – intant tradiziunala – attrat dürant la prüma dumengia d’october üna schurma da giasts. Raduond 5000 persunas da dastrusch e dalöntsch, giuven e vegl han visità las festivitats la fin d’eivna passada e festagià da cumpagnia la cultura cumünaivla rumantscha e ladina.

Program da festa multifari

Quist on es la Festa da la racolta nempe statta suot l’insaina dal pitschen proget d’Interreg «Raetia CulTour» da la Terra Raetica. Ün proget sur ils cunfins chi vuless rinforzar la ierta rumantscha e promouver la convivenza turistica ed economica tanter las duos regiuns vaschinas dal Vnuost e l’Engiadina Bassa/Val Müstair.

Sper ils arrandschamaints tradiziunals sco il cult divin ecumenic, il cortegi da festa ed il marchà cun passa 70 stands, han ils organisaturs perquai preschantà prümas ideas per novas sportas turisticas i’l sectur da la cultura. Sco per exaimpel l’avertüra dal cult divin tras il quartet da duonnas «DE CATER» da la Val Gardena, uschè sco plüssas otras rapreschantaziuns da gruppas da musica ladinas illas tendas da festa da las societats. Implü han visitaduras e visitadurs pudü tour part ad ün gö d’ingiavinera da cuntrabanda cul nom «Raetia CulTour cuntrabandist».

La Festa da la racolta a Valchava illa Val Müstair nun ha dimena be collià danövmaing las differentas generaziuns üna cun tschella, dimpersè quist on eir promovü l’amicizcha sur cunfin.