In GIE pil «parc da plumatschs»
Gl’interess public per la 92avla sesida dil parlament communal dad Ilanz/Glion ei staus gronds. Varga 40 persunas, da quellas biaras dalla fracziun Schnaus-Strada, han vuliu tedlar mesjamna sera la discussiun pertuccont ina garanzia da 350 000 francs pil project «White Pillow Park».
La discussiun ha cuzzau varga in’ura. 24 da 25 commembers dil parlament communal dad Ilanz/Glion ein stai presents ed han giu caschun da prender posiziun en caussa «White Pillow Parc». El center da quella 92avla sesida la mesjamna sera (mira era scaffa) ei stada la tractanda d’ina contribuziun da 350 000 francs à fond perdu pil «parc da plumatschs». Ina societad privata vul baghegiar silla parcella denter Strada ed il center da cumpra Aldi in grond implont da siglir pil sport da freestyle e snowboard. Enstagl da neiv consistan ils segls e la mesapipa da plumatschs gigants. La discussiun en caussa ha interessau era la populaziun. Varga 40 persunas han priu plaz el sectur dils hosps.
Per l’economia communala e regiunala
All’entschatta ha Fabiana Theus Simoni fatg la proposta da refusar la fatschenta. Quei che ha caschunau ina liunga debatta d’entrada. Suenter in’ura era quasi mintgin dils 24 parlamentaris s’exprimius. Cun 14 NA, 9 GIE ed ina abstenziun ha il parlament la finala refusau la proposta, aschia che la discussiun ha cuntinuau (mira era l’intervesta).
Il vicepresident communal Martin Capeder – naven digl 1. da schaner 2027 il niev president – ha plidau pil parc da plumatschs: Ins dueigi buca stinschentar e satrar in tal project, e quei avon che la discussiun hagi entschiet surlunder. Il project sustegni e promovi l’economia communala e regiunala.
Era auters han manegiau ch’ei seigi ina schanza per la vischnaunca, ton pli che la contribuziun da 350 000 francs vegni pagada ora pér il mument che tuttas lubientschas seigien dadas.
Breigia da capir
Gl’implont seigi unics en Svizra, el promovi la giuventetgna e sappi vitalisar l’economia da maniera multifara, ha la suprastonza communala scret el messadi per mauns dil parlament. Ils investurs privats vegnien cun in agen capital da 1,325 milliuns francs, ord il program San Gottardo vegnien 1,1 milliuns francs ed il Cantun garanteschi 450 000 francs. Quellas summas vegnan deliberadas culla cundiziun che la vischnaunca separticipeschi medemamein alla finanziaziun cun 350 000 francs.
«Tgei signal ei quei bein era, sche nus satrein quei project avon ch’el ha entschiet», ha in parlamentari rendiu attent. In auter ha manegiau: «Cun pagar quella summa dein nus tut ord maun. Schi biara glieud ha breigia da capir ch’ins pren ina tala decisiun mo alla sperta.»
La finala ha il parlament priu il conclus e decidiu la contribuziun da 350 000 francs pil «White Pillow Park». Quei cun 16 GIE, sis NA e duas abstenziuns. Il president communal futur Martin Capeder ha confirmau che votantas e votants hagien en tuttacass aunc caschun da s’exprimer all’urna en caussa, quei en connex culla midada da zona, ed ei detti leutier era ina radunonza d’orientaziun per sclarir damondas aviartas.
Cameras encunter vandals
A sia 92avla sesida ha il parlament dad Ilanz/Glion tractau aunc autras fatschentas. Aschia ina revisiun dalla lescha da polizia. Cun in resultat scart da 13 GIE encunter 11 NA dat il parlament glisch verda a cameras da survigilar loghens publics e prevegnir a vandalissem. Grazia allas cameras sappien ins eruir ils malfatschents e prender las mesiras necessarias. Quellas cameras veglien ins installar en loghens defini. L’installaziun vegni communicada e publicada els organs ufficials. La tractanda ei stada dispiteivla, demai ch’ina part dils parlamentaris ha fatg valer che la suprastonza hagi buc elaborau bein avunda la mesira.
Plinavon ha il parlament decidiu cun gronda maioritad da buca liquidar – sco proponiu dalla suprastonza communala – l’incumbensa che Ivo Frei haveva inoltrau cun conparlamentaris. Ussa duei il pievel all’urna decider, enteifer il project dalla revisiun totala dalla constituziun, sche la vischnaunca Ilanz/Glion duei fundar ina cumissiun da baghegiar ni buc.
Il parlament ha era priu notizia dall’incumbensa da Gierina Gabriel pertuccont ina nova lescha per la promoziun dall’economia. Per tschentar ils cunfins e definir las cundiziuns seigi quella pli che giavischada. Lu ha il president communal Marcus Beer rendiu attent alla votaziun dil pievel dils 29 da november 2026 pertuccont la cunvegna da prestaziun denter la SanaSurselva e la Reit da Sanadad Surselva. Per la populaziun dad Ilanz/Glion seigi quella votaziun da muntada eminenta, ha el puntuau. (fmr/abc)
Gust da leger dapli?