«In project da tala dimensiun sto vegnir schuber e detagliau sin meisa»
Memia biaras damondas detti ei en connex cun il project «White Pillow Park», manegia la parlamentara communala dad Ilanz/Glion Rita Duff. Ella sedosta per dapli transparenza ed informaziuns fundadas.
Rita Duff, habitonta da Strada e commembra dil parlament communal dad Ilanz/Glion, representa ils interess dalla populaziun da sia fracziun e giavischa dapli transparenza pil project privat da varga 4,2 milliuns francs. Cun ina brev aviarta, suttascretta da varga 120 persunas, fa ella attent a la suprastonza communala da Ilanz/Glion ch’ils da Strada ein buca d’accord che la vischnaunca vul dar al project ina contribuziun da 350 000 francs.
FMR: Cun in resultat clar da 14 NA e 9 GIE ed ina abstenziun ha il parlament buc acceptau la proposta da refusar la tractanda pil credit da 350 000 francs. Il project vegn in pass anavon, las damondas aviartas pertuccont il «parc da plumatschs» a Strada restan. Co veseis Vus quella situaziun?
Rita Duff: Jeu hai spitgau quei resultat. Culla discussiun dil parlament sundel jeu en sesez cuntenta. Ei ha dau moviment e la discussiun ei stada aviarta ed objectiva. Sco representanta dalla fracziun da Schnaus-Strada vesel jeu denton ch’il davos plaid en caussa ei aunc buca tschintschaus.
Vus vuleis pia s’engaschar vinavon encunter il «White Pillow Park»?
Gie, perquei ch’ei ha aunc ina pluna damondas e rispostas claras mauncan. Nus essan dil meini ch’in project da tala dimensiun stoppi vegnir schuber e detagliau sin meisa, e buca semplamein ch’ins pren e decida x-enzatgei ch’enzatgi vul realisar.
La suprastonza communala ha denton puntuau che tut quellas damondas aviartas vegnien sclaridas. En connex cul proceder dalla midada da zona egl areal Grüneck detti ei era aunc caschun d’informar, discutar e s’exprimer. Fideis Vus buca da quell’empermischun?
Jeu sai mo numnar in exempel co ei savess ir: Avon onns, cu ins ha baghegiau a Strada il center da cumpra, avon il nas dil territori habitau da Strada, essan nus sedefendi, cunzun pervia dil traffic. Lu ha ei giu num ch’ei detti ina rundella e che la fracziun da Strada vegni aschia descargada. Ussa ei la rundella cheu – e Strada ha buca dameins traffic. Aschia savess ei ir cun autras empermischuns ch’ins dat a nus.
Quei territori ei denton definius ufficialmein sco zona da mistregn e commerci. Far encunter a mintga project saveis tonaton buc, ni co?
Ina resgia regiunala havessen quels da Strada plitost acceptau. Perquei ch’in tal menaschi generass plazzas da lavur indigenas, ed ei vegness dau schanzas ad emprendistas ed emprendists.
Vegn la populaziun da Strada ussa a prender il referendum encunter la decisiun dil parlament?
Nus vegnin a s’entupar e discutar surlunder. Nus spitgein che la vischnaunca organisescha silmeins ina sera d’informaziun e discussiun publica en caussa dil project «White Pillow Park».
Gust da leger dapli?