«Eu surpigl respunsabiltà eir pro temas difficils e cuntravers»

Aita Zanetti: Sco politicra pella chosa analisescha per princip a fuond e cun premura. Sün basa da quist’analisa e davo avair pasà giò tuot las fatschettas dal svilup da mia lavur i’ls ultims ons sco capo, n’haja decis da vulair eir in avegnir m’ingaschar per nos cumün e da candidar per la reelecziun.

Eu n’ha fat mia valütaziun persunala e n’ha surgni eir differents rebombs chi han muossà cha’l fat chi nu d’eira ingüna schelta ha giovà üna gronda rolla. Cun actualmaing trais candidaturas han votantas e votants uossa üna tscherna.

Per analisar situaziuns cumplexas as stoja tour il temp necessari – uschea n’haja fat eir in vista al resultat da votaziun. Üna decisiun da tala importanza ha da madürar e sto gnir tratta in quietezza, e per quai voula eir temp. Quel temp am n’haja tutta ed uossa suna persvasa e decisa da vulair candidar per cuntinuar cun mia lavur a favur dal bön public – insembel cun üna suprastanza cun persunas cun vastas e differentas expertisas.

Eu cugnuosch nos cumün, sia glieud e las sfidas cha nus stain davant. Daspö il 2023 m’ingascha cun plaina persvasiun sco capo da Scuol pels bsögns da la populaziun e per ün svilup perdüraivel da nos cumün. Eu stun per cuntinuità, ün ir intuorn cun chüra cun nossas resursas ed üna collavuraziun constructiva. Cun quista lavur lessa cuntinuar.

Sco capo esa da portar üna gronda respunsabiltà, eir schi s’es confruntà cun tematicas difficilas e cuntraversas. Mia lavur sta suot l’insaina dal respet, eir scha las decisiuns nu chattan l’accoglientscha pro tuot la populaziun. Sco società staina avair chüra co cha nus giain intuorn ün cun tschel. Eu am sun eir dal tuottafat consciainta chi dà adüna chomps, ingio chi’s po far megldramaints ed eu sun grata, sch’eu survegn tschögns concrets in merit.

La porta da meis büro es adüna averta ed eu n’ha uraglias avertas per dumondas ed intimaziuns. Far politica pel cumün sainza resguardar la populaziun nun es pussibel. Trar decisiuns chi stan illa respunsabiltà da l’organ cumpetent toccan pro la lavur d’üna suprastanza e dal capo.

Displaschaivelmaing esa uschea cha sco capo e sco suprastanza nu’s poja far dret a tuot la glieud, causa cha la respunsabiltà vain portada per tuot il cumün – perquai am piglia gugent temp da confuonder cun persunas chi han eir oters maniamaints.

Critica constructiva ed averta es importanta e güda ad amegldrar la situaziun. Sco presidenta cumünala tocca pro mias incumbenzas da tour per mans eir temas difficils e cuntravers e da surtour respunsabiltà, independentamaing scha quels sun agreabels o brich.

Nos cumün sta eir i’ls prossems ons davant sfidas importantas. Lapro toccan finanzas cumünalas sanas, bunas cundiziuns da basa per noss’economia e da s-chaffir pussibiltats per nouv spazi d’abitar. Al listess mumaint vala da sviluppar inavant nos cumün in möd persistent e da tegner quint tant da nossas resursas natüralas sco eir da nossa cumünanza.

Dürant meis temp d’uffizi n’haja tut per mans insembel culla suprastanza differents progets chi han chattà l’accoglientscha pro la populaziun: Per exaimpel la ledscha da taxas da fabrica chi d’eira gnüda sbüttada a seis temp, la revisiun da la ledscha da vias champestras e da god. Plünavant vaina instradà la meglioraziun per las fracziuns dad Ardez e Guarda, scholt la ESTAG obain s-chaffi la basa per cha la Büvetta possa gnir sanada. Il proget da la Canorta dess render attractiv nos cumün per famiglias ed es eir d’incleger sco masüra da promoziun d’economia. La revisiun parziala da la zona d’hotel Paradis es gnüda acceptada. Progets in trais-cha sun sper il s-chodamaint a distanza e Scuol Solar eir las trattativas in connex cul areal da l’anteriur hotel Engadinerhof a Scuol. Cullas prolungaziuns da las cunvegnas da prestaziuns tanter il cumün e la Regiun Engiadina Bassa/Val Müstair, la Gurlaina SA e’l Bogn Engiadina vaina reglà collavuraziuns importantas pel cumün. Vi da la revisiun totala da la planisaziun locala es gnü lavurà intensivmaing e la sanaziun respectivamaing l’adattamaint da la scoula a Scuol d’eira tema fingià avant la fusiun.

Eu n’ha experienza, cugnuosch ils andamaints interns e n’ha grazcha a mia carica sco deputada dal circul da Suot Tasna üna vasta rait sur ils cunfins cumünals oura. Cun mia famiglia viva e lavura in cumün e n’ha mias ragischs quia. Fingià avant mia lavur politica sco deputada, suprastanta e capo am n’haja ingaschada a favur dal bön public, saja quai pro l’organisaziun dal «(s)pass da vacanzas», sco commembra e presidenta da la Società d’ütil public a Sent, illa società Pro Institut Ftan ed illa suprastanza e la cumischiun da gestiun da l’anteriura Chasa Puntota. In quella funcziun d’eira intretschada illas trattativas d’integraziun i’l CSEB e sun lura eir gnüda eletta sco vicepresidenta da quista importanta instituziun.