«Durant mia lavur poss jau ma relaxar»

Prest 200 professiuns vegnan preschentadas quest onn al Fiutscher. Pia è quai ina bun’occasiun per fufragnar tge ch’è il bel e main bel vi da singulas professiuns. Ina pitschna schelta tranter cuschiniera e polimecanist:

Arzu Mekhalieva, cuschiniera

«Mia professiun è cuschiniera. Nus essan l’entir di vi da cuschinar e vi da preparar las tratgas. Durant mia lavur poss jau propi ma relaxar ed jau vegn da ma concentrar bain. Betg uschè bel è ch’ins sto levar la damaun uschè baud. Ma jau pudess en mintga cas ta cussegliar mia professiun, perquai ch’i dat gronda variaziun. I dat adina puspè insatge nov en cuschina, e nossa lavur è fitg creativa.»

Elia Scherrer, mecatronist da pendicularas

«Jau lavur sco mecatronist da pendicularas. Nus essan responsabels che las pendicularas dal territori da skis funcziuneschian durant l’enviern. Sch’ellas na funcziuneschan betg, alura stuain nus far las reparaturas. Durant il temp che las pendicularas na van betg, p.ex. durant la stad, stuain nus far revisiuns, schubregiar tut e remplazzar la tocca rutta. Il pli bel per mai è che nus pudain lavurar dadora e sin las pitgas en l’autezza, che nus avain ina professiun varianta – da reparar las maschinas en l’ufficina fin midar ora las rollas sin las pitgas. Betg uschè bel è che nus n’emprendain en scola forsa betg tut uschè exact, tut resta in pau superfizial e betg en detagl. Ma sche ti has gugent blera variaziun en tia lavur, sche ti lavuras gugent en la natira, a l’aria frestga ed en il team, sche ti ris gugent cun tes collegas e sche ti has interess da la tecnica, lura fiss mecatronist da pendicularas segir ina professiun ideala per tai.»

Cédric Genoud, informaticher

«Jau sun en il quart onn d’emprendissadi sco informaticher, sco sviluppader da plattafurmas. Jau fatsch il pli savens support, vul dir che jau gid nossa clientella, sch’ella ha in problem cun il computer. Sch’ils clients han in nov PC u sch’els ston installar auters apparats d’informatica, alura emprov jau da gidar. Bel è, sch’ins po gidar e sch’ins vegn da schliar il problem dad ina chaussa. Sch’ins na vegn betg da schliar quel problem, e sch’ins dovra sez anc sustegn, lura n’è quai betg tant bel. Per exempel po quai esser il cas, sche Microsoft vegn ora cun in nov update ed ils clients restan bloccads. Jau ta cussegliass d’emprender mia professiun perquai ch’i dat propi mintgadi insatge da nov. Tut sa sviluppescha spert.»   

Sabrina Staub, constructura da models architectonics

«Mia professiun sa numna constructura da models architectonics. Mia incumbensa è da transfurmar ils plans dad architectas ed architects en models. Il bel da mia lavur è dad avair blera variaziun. Ins ha quasi mintga di ina nova incumbensa, in auter model, in’autra tecnica e novas sfidas per chattar ina soluziun co modellar in plan cumplitgà. Damai che jau fatsch gugent mia lavur, èsi grev da dir tge che na plascha betg. Ma mintgatant èsi stentus, sche jau sun vi da finir in model ed il client vuless anc midar quest u tschai. Sche ti fas gugent lavurs manualas, sche ti lavuras gugent cun differentas materialias e maschinas, lura pudess jau ta cussegliar mia lavur. Ed igl è dal rest bel da betg stuair seser l’entir di vi dal computer.»

Daimen Giger, polimecanist

«Jau lavur sco polimecanist tar la Trumpf. Nus fabritgain il bler maschinas da laser, endrizzain quellas e las vendain, cura ch’ellas èn finidas. Vi da mia clamada ma plascha ch’i dat uschè blera variaziun e che nus lavurain ensemen cun blers auters emprendists. Sche ti lavuras gugent cun ils mauns, alura fiss mes job segir era perfect per tai. Nus lavurain savens cun ils mauns e darar vi dal computer.»